Մենք ապրում ենք հասարակությունում, որի շատ անդամներ այլեւս իրենց կյանքն առանց Ֆեյսբուքի ու այնտեղ իրենց կարծիքը հայտնելու չի պատկերացնում: Միգուցե, դա ունի որոշակի առավելություններ: Իսկ թերությունն է այն, որ այս կամ այն բուռն քննարկման մասնակիցները չեն հիշում, կամ էլ ընդհանրապես չգիտեն, թե ինչ է եղել Հայաստանում, օրինակ, 5, 10 կամ 15 տարի առաջ:
Այդ բացը լրացնելու ցանկությամբ Մեդիամաքսը գործարկում է 5/10/15 խորագիրը, որն ամեն շաբաթ ներկայացնելու իրադարձությունները, որոնք տեղի էին ունենում Հայաստանում 5, 10 եւ 15 տարի առաջ:
• 15 ՏԱՐԻ ԱՌԱՋ՝ 2002 ԹՎԱԿԱՆԻ ՕԳՈՍՏՈՍԻ 28-ՍԵՊՏԵՄԲԵՐԻ 03
Հայ-ամերիկյան ռազմական կապերը
Օգոստոսի 28-ին ՀՀ պաշտպանության նախարար Սերժ Սարգսյանը ասել էր, որ հայ-ամերիկյան ռազմական կապերը «վերընթաց» զարգացում են ապրում:
Ելույթ ունենալով Հումանիտար ականազերծման կենտրոնում, որը ստեղծվել էր ամերիկյան կառավարության աջակցությամբ, Սերժ Սարգսյանը նշել էր, որ շուտով Հայաստանի եւ ԱՄՆ-ի ռազմական գերատեսչությունները կսկսեն իրականացնել ռազմական կադրերի ուսուցման եւ ՀՀ զինված ուժերի կապի համակարգի արդիականացման ծրագրերը:
Ռուսական ռազմակայանների դուրս բերումը Վրաստանից
Օգոստոսի 29-ին Ջավախքում գործող «Վիրք» կուսակցության նախագահ Դավիթ Ռստակյանը հույս էր հայտնել, որ նախագահ Էդուարդ Շեւարնադձեն հավանություն չի տա խորհրդարանի ընդունած՝ Վրաստանից ռուսական ռազմակայանների դուրս բերման որոշմանը:
Լուսանկարը` REUTERS
Ռստակյանն ասում էր, որ Ախալքալաքից ռուսական ռազմական բազայի արագացված դուրս բերումը կարող է ապակայունացնել իրավիճակը տարածաշրջանում, քանի որ կայանը հանդիսանում է տարածաշրջանի բնակիչների տնտեսական կայունության երաշխավորը:
Վրաստանից ռուսական ռազմակայանների դուրս բերման գործընթացը մեկնարկեց 2005 թվականին եւ ավարտվեց 2007-ին: Այն Ջավախքում իրավավիճակի ապակայունացման պատճառ չդարձավ:
«Հանրապետությունը», Քոչարյանն ու իմպիչմենտը
Երեւանի նախկին քաղաքապետ Ալբերտ Բազեյանը օգոստոսի 29-ին հայտարարեց, որ «Հանրապետություն» կուսակցության համար Հայաստանի նախագահ Ռոբերտ Քոչարյանի իմպիչմենտի հարցը «սկզբունքային է»: Բազեյանն ասում էր, որ Հայաստանի նախագահը «բազմիցս խախտել է երկրի Սահմանադրությունը եւ չարաշահել իր պաշտոնական լիազորությունները»:
Իմպիչմենտի գործընթացը չսկսվեց:
Հանրապետական կուսակցությունը եւ Քոչարյանը
Սեպտեմբերի 3-ին «Միասնություն» խորհրդարանական խմբակցության ղեկավար Գալուստ Սահակյանը հայտարարել էր, որ Հայաստանի Հանրապետական կուսակցությունը «ամենայն հավանականությամբ» կսատարի Ռոբերտ Քոչարյանի թեկնածությունը 2003 թվականի փետրվարին կայանալիք նախագահական ընտրություններում:
Գալուստ Սահակյանը նաեւ նշել էր, որ ՀՀԿ-ն «պատրաստ է նախագահ Ռոբերտ Քոչարյանի հետ կիսել ազնիվ եւ արդար ընտրությունների անցկացման պատասխանատվությունը»:
• 10 ՏԱՐԻ ԱՌԱՋ՝ 2007 ԹՎԱԿԱՆԻ ՕԳՈՍՏՈՍԻ 28-ՍԵՊՏԵՄԲԵՐԻ 03
ԼՂՀ անկախության ճանաչումը՝ կողմ եւ դեմ
Սեպտեմբերի 1-ին ՀՀ ԱԳՆ մամուլի քարտուղար Վլադիմիր Կարապետյանը հայտարարել էր, որ «Հայաստանի կողմից Լեռնային Ղարաբաղի ճանաչման ժամանակը դեռ չի եկել»:
Լուսանկարը` Վ.Կարապետյանի արխիվից
Այդպես նա մեկնաբանել էր Հայաստանի կողմից ԼՂՀ անկախության ճանաչման «Ժառանգություն» կուսակցության ներկայացրած օրինագիծը: «ԼՂՀ ճանաչումը եղել եւ մնում է Հայաստանի արտաքին քաղաքականության զինանոցում: Այն պետք է իրականացվի այն ժամանակ, երբ առավել արդյունավետ կլինի եւ կնպաստի հարցի վերջնական լուծմանը: Այդ ժամանակը դեռ չի եկել», - ասում էր Վլադիմիր Կարապետյանը:
Իսկ Հայաստանի Ազգային Ժողովի նախագահ Տիգրան Թորոսյանը սեպտեմբերի 3-ին ասել էր, որ «ամեն տարի որպես օրենք ընդունելով Լեռնային Ղարաբաղին միջպետական վարկ տրամադրելու մասին դրույթը, ՀՀ խորհրդարանը ճանաչում է ԼՂՀ անկախությունը»:
• 5 ՏԱՐԻ ԱՌԱՋ՝ 2012 ԹՎԱԿԱՆԻ ՕԳՈՍՏՈՍԻ 28-ՍԵՊՏԵՄԲԵՐԻ 03
Սաֆարովի վերադարձը Ադրբեջան
Օգոստոսի 31-ին Հունգարիայում հայ սպա Գուրգեն Մարգարյանի դաժան սպանության համար ցմահ դատապարտված Ռամիլ Սաֆարովը վերադարձավ Ադրբեջան եւ անմիջապես ներման արժանացավ նախագահ Իլհամ Ալիեւի կողմից:
Օտարերկրյա դեսպանների հետ արտահերթ հանդիպման ժամանակ ՀՀ նախագահ Սերժ Սարգսյանը հայտարարեց, որ Հայաստանը որոշում է կայացրել կասեցնել դիվանագիտական հարաբերությունները Հունգարիայի հետ:
«Իրենց այս համատեղ գործողություններով Հունգարիայի եւ Ադրբեջանի իշխանությունները դուռ բացեցին նման հանցագործությունների կրկնության համար: Այս որոշմամբ նրանք ուղերձ են տալիս մարդասպաններին: Նրանք այսուհետեւ գիտեն, որ էթնիկ կամ կրոնական ատելության հողի վրա կատարված սպանությունը կարող է անպատիժ մնալ», - ասել էր ՀՀ նախագահը:
Լուսանկարը` REUTERS
Բուդապեշտում մի քանի հազար մարդ դուրս եկավ ցույցի՝ բողոքելով վարչապետ Վիկտոր Օրբանի գլխավորած կառավարության գործողությունների դեմ:
Անցել է 5 տարի, Հայաստանի եւ Հունգարիայի հարաբերությունները շարունակում են կասեցված մնալ:
Արա Թադեւոսյան
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: