Մենք ապրում ենք հասարակությունում, որի շատ անդամներ այլեւս իրենց կյանքն առանց Ֆեյսբուքի ու այնտեղ իրենց կարծիքը հայտնելու չի պատկերացնում: Միգուցե, դա ունի որոշակի առավելություններ: Իսկ թերությունն է այն, որ այս կամ այն բուռն քննարկման մասնակիցները չեն հիշում, կամ էլ ընդհանրապես չգիտեն, թե ինչ է եղել Հայաստանում, օրինակ, 5, 10 կամ 15 տարի առաջ: 

Այդ բացը լրացնելու ցանկությամբ Մեդիամաքս-ը վարում է 5/10/15 խորագիրը, որն ամեն շաբաթ ներկայացնում է իրադարձությունները, որոնք տեղի էին ունենում Հայաստանում 5, 10 եւ 15 տարի առաջ:

• 15 ՏԱՐԻ ԱՌԱՋ. 2003 ԹՎԱԿԱՆԻ ՕԳՈՍՏՈՍԻ 27-ՍԵՊՏԵՄԲԵՐԻ 2

Ընդդեմ պատի

Օգոստոսի 30-ին Երուսաղեմի Հայոց Պատրիարք Թորգոմ Մանուկյանն իր ստորագրությունն էր դրել Սուրբ Հողում գործող բոլոր քրիստոնեական եկեղեցիների ներկայացուցիչների հայտարարության տակ՝ ընդդեմ Իսրայելը եւ պաղեստինյան տարածքները բաժանող պատի շինարարության:

Քրիստոնեական եկեղեցիների առաջնորդները հատուկ մտահոգություն էին հայտնել Բեթղեհեմում պատի շինարարության նախագծերի կապակցությամբ, «որը Հիսուս Քրիստոսի ծննդավայրն է հանդիսանում»: 

Պատրիարք Թորգոմ Մանուկյանն ու Պաղեստինի ղեկավար Մահմուդ Աբասը

Լուսանկարը` REUTERS

Հայտարարության հեղինակները նշել էին, որ պատի շինարարությունը «կարող է կործանիչ հետեւանքներ ունենալ քրիստոնեական համայնքի համար, հանգեցնել վերջինիս մեկուսացմանը եւ տեղաշարժվելու ազատության սահմանափակմանը»:

• 10 ՏԱՐԻ ԱՌԱՋ. 2008 ԹՎԱԿԱՆԻ ՕԳՈՍՏՈՍԻ 27-ՍԵՊՏԵՄԲԵՐԻ 2

Առանց այլընտրանքի եւ սակարկումների

Սեպտեմբերի 2-ին Արցախի նախագահ Բակո Սահակյանը ասել էր, որ  Լեռնային Ղարաբաղի անկախությունը «այլընտրանք չունի եւ սակարկության ենթակա չէ»

«Մենք պարտավոր ենք իրականություն դարձնել մեր նահատակների նվիրական երազանքը` հասնել Լեռնային Ղարաբաղի Հանրապետության միջազգային ճանաչմանը եւ սերունդներին թողնել հզոր ու անկախ, խաղաղ ու բարգավաճ հայրենիք: Վստահ եղեք, դա ժամանակի հարց է»,- ասել էր Արցախի նախագահը:

«Երրորդ սկզբունքը»

Սեպտեմբերի 2-ին Հայաստանի առաջին նախագահ Լեւոն Տեր-Պետրոսյանն ասել էր, որ սառեցված հակամարտությունների լուծումը կարող է բարդացնել մնացած խնդիրների կարգավորման գործընթացը, այդ թվում նաեւ` ղարաբաղյանը:

«Մի կողմից, սառեցված հակամարտությունները մեկը մյուսի հետեւից լուծում են ստանում: Մյուս կողմից, այդ լուծումները չեն նշանակում, որ մնացած հակամարտությունների լուծումն ավելի դյուրին է դառնում: Ավելին, ես չեմ բացառում, որ Կոսովոյի, Հարավային Օսիայի եւ Աբխազիայի հակամարտությունների լուծումը կարող է ավելի բարդացնել մնացած խնդիրների կարգավորման գործընթացը, այդ թվում նաեւ` ղարաբաղյանը»,- ասել էր Լեւոն Տեր-Պետրոսյանը:

Լեւոն Տեր-Պետրոսյանը

Լուսանկարը` Ֆոտոլուր

Նա նշել էր, որ չնայած երկու հիմնական` տարածքային ամբողջականության ու ժողովուրդների ինքնորոշման մասին սկզբունքների առկայությանը, «իրականում գործում է երրորդ` քաղաքական նպատակահարմարության սկզբունքը»:

«Ելնելով իրենց նպատակներից, գերտերությունները կարող են առաջնահերթությունը տալ տարածքային ամբողջականության սկզբունքին, մյուս դեպքում` ժողովուրդների ինքնորոշման սկզբունքին»,- ասում էր Լեւոն Տեր-Պետրոսյանը:

Արա Թադեւոսյան