Մենք ապրում ենք հասարակությունում, որի շատ անդամներ այլեւս իրենց կյանքն առանց Ֆեյսբուքի ու այնտեղ իրենց կարծիքը հայտնելու չի պատկերացնում: Միգուցե, դա ունի որոշակի առավելություններ: Իսկ թերությունն է այն, որ այս կամ այն բուռն քննարկման մասնակիցները չեն հիշում, կամ էլ ընդհանրապես չգիտեն, թե ինչ է եղել Հայաստանում, օրինակ, 5, 10 կամ 15 տարի առաջ:
Այդ բացը լրացնելու ցանկությամբ Մեդիամաքս-ը վարում է 5/10/15 խորագիրը, որն ամեն շաբաթ ներկայացնում է իրադարձությունները, որոնք տեղի էին ունենում Հայաստանում 5, 10 եւ 15 տարի առաջ:
• 15 ՏԱՐԻ ԱՌԱՋ. 2003 ԹՎԱԿԱՆԻ ՀՈԿՏԵՄԲԵՐԻ 08-14
«Միջնորդները դեռ պատրաստ չեն»
Հոկտեմբերի 8-ին ԵԱՀԿ Մինսկի խմբի ռուսաստանյան համանախագահ Յուրի Մերզլյակովն Մեդիամաքս-ին տված հարցազրույցում ասել էր, որ «դեռեւս վաղ է խոսել այն մասին, որ տարածաշրջան նախատեսվող այցի ընթացքում միջնորդները կողմերին կներկայացնեն Լեռնային Ղարաբաղի հակամարտության կարգավորման փաստաթղթավորված առաջարկներ»:
«Մենք դեռ քննարկելու եւ մանրամասնելու ենք դրանք: Խոսքը գնում է ամենանախնական գաղափարների մասին, որոնք վերաբերվում են նույնիսկ ոչ թե կարգավորմանը, այլ խաղաղ գործընթացի վերսկսմանը»,- ասել էր ռուսաստանցի համանախագահը:
Պատասխանելով այն հարցին, թե արդյո՞ք ուժի մեջ կմնան 2001 թվականին Փարիզում եւ Քի Վեսթում Հայաստանի եւ Ադրբեջանի նախագահների կողմից ձեռք բերված պայմանավորվածությունները, Յուրի Մերզլյակովն ասել էր.
Լուսանկարը` Postimees/Scanpix
«Մենք ելնում ենք այն պայմանավորվածություններից, որոնք ձեռք են բերվել ամենաբարձր մակարդակի վրա` երկու երկրների նախագահների միջեւ: Այլ պայմանավորվածությունների մասին ես ոչինչ չգիտեմ: Մենք ելնում ենք այն կետից, որի վրա կանգ էին առել Հայաստանի եւ Ադրբեջանի նախագահները համարյա մեկ տարի առաջ կայացած իրենց վերջին հանդիպման ժամանակ»:
• 10 ՏԱՐԻ ԱՌԱՋ. 2008 ԹՎԱԿԱՆԻ ՀՈԿՏԵՄԲԵՐԻ 08-14
«Հաջողությամբ չեն պսակվել»
Հոկտեմբերի 13-ին Ռուսաստանի տրանսպորտի նախարար Իգոր Լեւիտինը հաստատել էր տեղեկությունն այն մասին, որ Ռուսաստանը բանակցություններ էր վարել Ադրբեջանի եւ Թուրքիայի հետ` Կարս-Գյումրի երթուղով երկաթուղային հաղորդակցության վերականգնման ուղղությամբ, որոնք, սակայն, հաջողությամբ չեն պսակվել:
Լեւիտինը RBC Daily-ին տված հարցազրույցում ասել էր, որ բանակցություններն անցկացվում էին Կարս-Ախալքալաք-Բաքու նոր երկաթուղի կառուցելու Թուրքիայի, Ադրբեջանի եւ Վրաստանի ծրագրի համատեքստում:
«Թուրք եւ ադրբեջանցի գործընկերների հետ նախնական բանակցությունների ընթացքում մենք ասում էինք, որ նոր ճյուղի շինարարությունը լրացուցիչ միջոցներ կպահանջի: Մենք ճյուղ ունենք, եւ այն կարելի է բացել երրորդ կողմի` Հայաստանի միջոցով, որը պատրաստ է մասնակցել բոլոր հարցերի կարգավորմանը»,- ասել էր Իգոր Լեւիտինը:
Ռուսաստանցի նախարարն ասել էր, որ «այդ առաջարկը չընդունվեց. Ադրբեջանը հաստատեց, որ մասնակցելու է Կարս-Ախալքալաք-Բաքու երկաթուղային գծի շինարարությանը»:
• 5 ՏԱՐԻ ԱՌԱՋ. 2013 ԹՎԱԿԱՆԻ ՀՈԿՏԵՄԲԵՐԻ 08-14
«Հայաստանի նախագահը ժամանակին հետ կանգնեց»
Հոկտեմբերի 10-ին Ռուսաստանի նախագահի խորհրդական Սերգեյ Գլազեւն հայտարարել էր, որ «Հայաստանի նախագահը ժամանակին հետ կանգնեց եւ կարգի հրավիրեց իր կառավարությունը»:
«Էխո Մոսկվի» ռադիոկայանի հետ հարցազրույցում Գլազեւը ասել էր, որ «Հայաստանին գրեթե խցկել են կոնվեյերի մեջ, բայց մեր փորձագետների օգնությամբ մենք օգնեցինք հայ գործընկերներին վերլուծել Եվրամիության հետ համաձայնագրի տեքստը»:
«Չի կարելի միաժամանակ ասոցացվել Եվրամիության հետ եւ Ռուսաստանի հետ ընդհանուր տնտեսական տարածքի համաձայնագիր ստորագրել: Հայաստանի կառավարությունը խճճվել էր այդ ընտրության մեջ: Նրանք էլ էին կարծում, որ կարելի է միաժամանակ ստորագրել ԵՄ-ի հետ համաձայնագիր եւ, օրինակ, լինել ՀԱՊԿ-ի կազմում: Իսկ այնտեղ կա նաեւ քաղաքական մաս, որտեղ գրված է, որ ԵՄ-ի հետ ասոցացված կողմը պարտավորվում է հետեւել եվրոպական քաղաքականությանը եւ ԵՄ հովանու ներքո մասնակցել տարածարջանային հակամարտությունների կարգավորմանը: Եվ այդ ժամանակ նախագահը, որպես երկրի անվտանգության համար պատասխանատու անձ, հարց է տալիս. «Ինչպե՞ս են նրանք ԵՄ հովանու ներքո մասնակցելու Լեռնային Ղարաբաղի հակամարտության կարգավորմանը»: Հետաքրքիր հարց է: Երբ սկսում են նման պարզ հարցեր տալ, ակնհայտ է դառնում, որ Ասոցացման համաձայնագրի նախագիծը զրկում է երկիրն ինքնիշխանությունից, անկախությունից եւ նրան վերածում է Եվրամիության գաղութի»,- ասել էր Գլազեւը:
Արա Թադեւոսյան
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: