Ֆրանսիայի Սենատն ընդունեց Հայոց ցեղասպանության ժխտումը քրեականացնող օրինագիծը

Ինչպես հաղորդում է Մեդիամաքս-ը, ֆրանսիացի սենատորները 127  “կողմ”, 86 “դեմ” ձայների հարաբերակցությամբ հավանության են արժանացրել նախագահ Նիկոլա Սարկոզիի գլխավորած “Միություն հանուն ժողովրդական շարժման” կուսակցության պատգամավոր Վալերի Բուայեի հեղիանակած օրինագիծը:

Օրինագիծը, որը 2011թ. դեկտեմբերի 22-ին ընդունվել էր նաեւ Ֆրանսիայի Ազգային ժողովում, նախատեսում է 1 տարի ազատազրկում եւ 45 հազար եվրո տուգանք Ֆրանսիայի տարածքում Հայոց ցեղասպանության եւ այլ ցեղասպանությունների ժխտման համար:

Ֆրանսիայի Սահմանադրության համաձայն, Ազգային ժողովի եւ Սենատի կողմից ընդունված օրինագիծը պետք է ստորագրվի եւ հաստատվի երկրի նախագահի կողմից:

Ավելի վաղ ֆրանսիահայ մշակույթի գործիչները, այդ թվում աշխարհահռչակ շանսոնյե Շառլ Ազնավուրը, դերասաններ Սիմոն Աբգարյանը, Սերժ Ավետիքյանը, պրոդյուսեր Ալան Թերզյանը եւ ուրիշներ, հանդես են եկել համատեղ հայտարարությամբ, որով կոչ են արել ֆրանսիացի սենատորներին ընդունել օրինագիծը:  

Մեդիամաքս-ը հիշեցնում է, որ Ֆրանսիայի նախագահ Նիկոլա Սարկոզին այս տարի Երեւան կատարած պետական այցի ընթացքում ասել էր, որ եթե Թուրքիան չճանաչի Հայոց ցեղասպանությունը, «Ֆրանսիան ավելի առաջ կգնա»:

«Հավաքական ժխտողականությունը շատ ավելի վտանգավոր է եւ շատ ավելի անընդունելի է, քան ժխտողականությունն անհատական մակարդակում: Թուրքիան մեծ երկիր է եւ պիտի կարողանա ճիշտ նայել իր անցյալին, պիտի կարողանա ուղիղ նայել իր սեփական պատմության ինչպես լուսավոր, այնպես էլ ստվերոտ էջերին: Ճիշտ այնպես, ինչպես դա արել են այլ մեծ պետությունները, ինչպես, օրինակ, Գերմանիան: Եթե Թուրքիան կատարի իր պատմական տուրքը, ապա մենք կմնանք այնտեղ, որտեղ հիմա ենք, կմնանք նույն տեղում: Իսկ եթե Թուրքիան չանի դա, մենք ավելի առաջ կգնանք»,- ասել էր Սարկոզին՝ պատասխանելով այն հարցին, թե կարո՞ղ է արդյոք Ֆրանսիան քրեորեն դատապարտել Հայոց ցեղասպանության ժխտողականությունը:

վերադառնալ