Երեւան: Մեդիամաքս: ՀՀ կառավարությունն այսօրվա նիստում որոշել է վերանայել զինվորական կենսաթոշակների եւ պարգեւավճարների ֆինանսավորման ընթացակարգերը եւ զինվորական կենսաթոշակների նշանակման եւ վճարման ցուցակների ձեւավորման գործընթացն իրականացնել էլեկտրոնային կենսաթոշակ տեղեկատվական համակարգի միջոցով:
ՀՀ աշխատանքի եւ սոցիալական հարցերի նախարար Արտեմ Ասատրյանը նշել է, որ գործող կարգի համաձայն՝ համապատասխան մարմիններն իրականացնում են իրենց համակարգի զինծառայողների եւ նրանց ընտանիքների անդամների զինվորական կենսաթոշակների եւ պարգեւավճարների նշանակման գործառույթը: Դա իրականացնում են «Զինկենսաթոշակ» տեղեկատվական համակարգի միջոցով, որը կենսաթոշակառուների հաշվառման միասնական տեղեկատվական համակարգի բաղկացուցիչ մաս է:
Միաժամանակ, պաշտպանության նախարարության համակարգի կենսաթոշակառուի կենսաթոշակը կանխիկ եղանակով վճարվում է տարածքային զինվորական կոմիսարիատների միջոցով:
«Աշխատանքի եւ սոցիալական հարցերի նախարարության եւ համապատասխան մարմինների եւ կառավարության աշխատակազմի հետ բավական աշխատանքներ են տարվել զինվորական կենսաթոշակ նշանակելու եւ վճարելու գործառույթներն «Էլեկտրոնային կենսաթոշակ» տեղեկատվական համակարգի միջոցով իրականացնելու ուղղությամբ: Ստեղծվել է միասնական ցանց, համապատասխան մարմինները ներառվել են այնտեղ, իրականացվել են նաեւ վերապատրաստումներ»,- նշել է նախարարը:
2018թ. հունվարի 1-ից համապատասխան մարմիններում զինծառայության թոշակները կնշանակվեն եւ կվճարվեն «Էլեկտրոնային կենսաթոշակ» համակարգի միջոցով, իսկ պաշտպանության նախարարության կենսաթոշակառուի թոշակը կանխիկ եղանակով կվճարվի «Հայփոստ»-ի միջոցով:
«Միեւնույն ժամանակ, 2017թ. նոյեմբերի 1-ից մինչեւ 2018թ. հունվարի 1-ը` երկու ամսով, կիրականացվի փորձնական ծրագիր, որպեսզի զուգահեռաբար ստացվեն ցուցակները հին եւ նոր համակարգով, եւ 2018թ. հունվարի 1-ից լիարժեք անցում կկատարենք նոր համակարգին»,- ասել է Արտեմ Ասատրյանը:
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: