Երեւան: Մեդիամաքս: Կյանքի կկոչվի զինծառայողներին հիփոթեքային վարկավորման աննախադեպ պայմաններ առաջարկող ծրագիր:

Այդ մասին ասել է ՀՀ պաշտպանության նախարար Վիգեն Սարգսյանը՝ 2-րդ բանակային զորամիավորման զորամասեր կատարած այցի ընթացքում:

ՀՀ պաշտպանական գերատեսչության ղեկավարը ՀՀ Զինված ուժերի Գլխավոր շտաբի պետի առաջին տեղակալ, գեներալ-մայոր Օնիկ Գասպարյանի ուղեկցությամբ

Վիգեն Սարգսյանը հանդիպել է զորամասերի սպայակազմի հետ, խոսել է զինված ուժերում սկիզբ առած կառուցվածքային լուրջ բարեփոխումների մասին:

Նա, մասնավորապես, անդրադարձել բանակի արդիականացման յոթնամյա ծրագրի հիմնական ուղղություններին, «Ես եմ», «Պատիվ ունեմ», «Դիտակետ» ծրագրերին եւ դրանց ակնկալվող արդյունքներին:

Վիգեն Սարգսյանն ընդգծել է, որ հետեւողական քայլեր են ձեռնարկվում ռազմակրթական ոլորտում սպայական մասնագիտության նկատմամբ գրավչության աճն ապահովելու եւ զինված ուժերն առավել բանիմաց ու հմուտ սպաներով համալրելու ուղղությամբ:

Նախարարը շեշտել է, որ զինծառայողների կենցաղային պայմանների բարելավման եւ նրանց սոցիալական պաշտպանության հարցերը գտնվում են երկրի ղեկավարության ուշադրության կենտրոնում։