97575 դիտում

Գնաճը համահունչ է դրամի արժեզրկմանը, պնդում է հանձնաժողովի նախագահը


Արտակ Շաբոյանը
Արտակ Շաբոյանը

Լուսանկարը` Photolure


Երեւան: Մեդիամաքս: ՀՀ տնտեսական մրցակցության պաշտպանության պետական հանձնաժողովի նախագահ Արտակ Շաբոյանն այսօր ասել է, որ գնաճը Հայաստանում համահունչ է փոխարժեքի փոփոխությանը:

Այդ մասին նա ասել է կառավարության նիստում:

«Ուսումնասիրության նպատակով առանձնացրել ենք այն ապրանքային շուկաները, որտեղ գործունեություն են իրականացնում խոշոր ընկերությունները: Այնուհետեւ առանձնացրել ենք այն ապրանքները, որոնք սոցիալական նշանակություն ունեն՝ շաքարավազ, կարագ, ձեթ, հավի միս, հավկիթ, սուրճ, ալյուր եւ այլն:

Ուսումնասիրությունը կատարվել է նոյեմբերի սկզբից մինչեւ դեկտեմբերի 10-ն ընկած ժամանակահատվածում, երբ դրամն ԱՄՆ դոլարի համեմատ արժեզրկվել է շուրջ 13 տոկոսով՝ 411-ից հասնելով 463 դրամի: Փոխարժեքի փոփոխությունն իր ուղղակի եւ անմիջական ազդեցությունն է թողել ներմուծված ապրանքների գների վրա, որոնք սկսել են բարձրանալ նոյեմբերի 20-ից սկսած: Այնուհետեւ գնային բարձրացում է արձանագրվել նաեւ տեղական արտադրության ապրանքային շուկաներում, որոնցից հանձնաժողովի տեսադաշտում է կաթնամթերքի ոլորտը», - ասել է Արտակ Շաբոյանը:

Նա նկատել է, որ դիտարկված ապրանքատեսակների գնային փոփոխությունները տատանվում են 2-12, 13 տոկոսի միջակայքում, այն դեպքում, երբ դրամի արժեզրկումը կազմել է 13 տոկոս: «Կարելի է ասել, որ գնային փոփոխությունները համահունչ են փոխարժեքի փոփոխություններին, եւ փոխարժեքի փոփոխման վերին շեմը չեն գերազանցում», - ասել է Արտակ Շաբոյանը:

Կարծիքներ

Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում:

Մեր ընտրանին
banks.am
itel.am
sport
bravo.am