Երեւան: Մեդիամաքս: Անվճար ուսուցման համակարգ ընդունված ուսանողների թվի 10%-ի չափով վճարովի համակարգ ընդունված ուսանողների փոխհատուցումը կկատարվի բուհի միջոցների հաշվին:

Բուհական համակարգում ներդրված այս նորամուծության մասին ՀՀ կրթության եւ գիտության նախարար Արմեն Աշոտյանը հայտարարել է այսօր՝ բուհերի ռեկտորների հետ գալիք ուսումնական տարվա նախապատրաստական աշխատանքների քննարկման ժամանակ:

ԿԳՆ մամուլի ծառայությունից հայտնում են, որ կառավարությունը հաջորդ տարի 2500 ուսանողի համար նախատեսել է բյուջետային միջոցներ, որպեսզի անապահով ընտանիքների համակարգում ընդգրկված եւ միջին որակական գնահատականի (ՄՈԳ) համապատասխան նիշ ունեցող ընտանիքների ուսանողները ստանան 50-100% զեղչ:

Անդրադառնալով սահմանապահ համայնքների ուսանողների ուսման վարձի զեղչի եւ անհատական մուծման գրաֆիկի հնարավորության հարցին` Արմեն Աշոտյանն ասել է, որ այս տարի եւս ՀՀ կառավարությունը սահմանամերձ համայնքներում կիրականացնի նպատակային քաղաքականություն:

Նախորդ տարի սահմանված 14 սահմանամերձ համայնքների թիվը կընդլայնվի՝ հասնելով 31-ի: Առաջին կուրսում այդ ուսանողների համար ուսման վարձավճարի զեղչը կկազմի 10%, մնացած կուրսերում՝ 20%: