Երեւան: Մեդիամաքս: ՀՀ կրթության եւ գիտության նախարար Լեւոն Մկրտչյանն այսօր ասել է, որ կրթության որակի անկման հիմնական պատճառներից մեկը համալսարանների խիստ կախվածությունն է ուսանողի վարձավճարներից:

Այս մասին նախարարն ասել է բարձրագույն կրթության ֆինանսավորման համակարգի բարեփոխման նպատակով անձեռնմխելի ֆոնդերի ստեղծմանը նվիրված քննարկման ժամանակ:

Լեւոն Մկրտչյանն ընդգծել է, որ բուհերի կառավարման համակարգում առկա խնդիրները քննարկելիս առաջացել է անձեռնմխելի ֆոնդերի ստեղծման գաղափարը:

«Հայաստանի բուհական ողջ համակարգը պետք է դիտարկենք որպես մեկ միասնական կլաստեր, ուսանողական տարածք կամ մեծ համալսարան` ապահովելով կառավարման արդյունավետ համակարգ, ֆինանսական քաղաքականություն, որի նպատակն է բուհական համակարգի զարգացումը` ուսանողների ազատ շարժունությամբ, համալսարանների նյութական ռեսուրսների մատչելիությամբ»,- ասել է նախարարը:

Քննարկմանը նշվել է, որ անձեռնմխելի ֆոնդը նվիրատուի պահանջով մշտապես պահպանվող դրամագլուխ է, որը հանդիսանում է բուհի սեփականությունը: Այն ձեւավորվում եւ համալրվում է հանգանակության, նվիրատվության, ժառանգության, դրամաշնորհների, ինչպես նաեւ ֆոնդի կառավարման արդյունքում ստացված եկամտի չօգտագործված մասի ֆոնդին փոխանցման արդյունքում:

Ֆոնդի եկամտից ձեւավորված տարեկան մասհանումները նպատակ ունեն հոգալ հաստատության կամ դրա առանձին ծրագրի ծախսերը:

Տեղաբաշխման ուղղություններ կարող են հանդիսանալ` գիտաշխատողների դրամաշնորհային աջակցությունը, գիտական ծրագրերի ֆինանսավորումը, անվանական կրթաթոշակների հաստատումը եւ այլն:

Ֆոնդի տարեկան մասհանումները պետք է չգերազանցեն ֆոնդի կառավարման արդյունքում ստացված եկամուտները:

Պայմանավորվածություն է ձեռք բերվել, որ աշխատանքային խումբը կմշակի բուհերի անձեռնմխելի ֆոնդերի գործառնության սկզբունքները՝ քննարկելով այն բուհերի եւ բանկերի հետ, ու կներկայացնի ԿԳՆ-ի քննարկմանը: Վերջինս էլ ֆոնդերի ձեւավորման անհրաժեշտ օրենսդրական հիմքերը կներկայացնի կառավարությանը: