Երեւան: Մեդիամաքս: Եվրոպայի խորհրդի խորհրդարանական վեհաժողովի մոնիթորինգի հանձնաժողովի անդամներ, ԵԽԽՎ համազեկուցողներ Ալան Միլը եւ Ջուզեպպե Գալատին այսօր ասել են, որ Հայաստանը համապետական ընտրություններից հետո փոփոխությունների եւ զարգացումների հաջորդ փուլն է թեւակոխել:

Այս մասին համազեկուցողները նշել են ՀՀ վարչապետ Կարեն Կարապետյանի հետ հանդիպմանը:

Կարեն Կարապետյանն էլ նշել է, որ Հայաստանը մեծ ճանապարհ է անցել օրենսդրական բարեփոխումների փաթեթների մշակման գործում:

«Մենք հատուկ ուշադրություն ենք դարձնում բիզնես միջավայրին, արձանագրում ենք, որ վերջին մեկ տարում ունենք դրական արդյունքներ, բայց գիտենք նաեւ թույլ կետերը եւ աշխատում ենք դրանք վերացնելու ուղղությամբ»,- ասել է վարչապետը:

ԵԽԽՎ համազեկուցողները ողջունել են Հայաստանի կառավարության կողմից իրականացվող բարեփոխումները:

«Կարելի է երկու բանի համար շնորհակալություն հայտնել՝ նախ, այն արժանապատիվ եւ լուրջ մոտեցման համար, որ ձեր երկիրը ցուցաբերում է Սիրիայից փախստականների, մասնավորապես, սփյուռքահայերի հոսքի առումով: Մենք երախտապարտ ենք դրա համար. դա օրինակ է, որից այլ ազգերը կարող են սովորել եւ որի վրա կարող են հիմնվել: Եվրոպայի խորհրդի անունից էլ շնորհակալ ենք ձեզ այն աշխատանքի համար, որը Եվրոպայում կատարում են ՀՀ դիվանագետներն ու ներկայացուցիչները, ԵԽԽՎ-ում ձեր պատվիրակությունը: Մենք կարող ենք հավաստիացնել, որ կշարունակենք օժանդակել ձեզ, որպեսզի ձեր երազած նոր Հայաստանը կառուցելու ճանապարհին այդ տեմպը պահպանեք»,- ասել է Ալան Միլը:

Կարեն Կարապետյանն ընդգծել է, որ Եվրոպայի խորհրդի հետ հարաբերությունները կշարունակվեն խորանալ՝ համաձայն Հայաստանի ստանձնած հանձնառությունների եւ քաղաքական պարտավորությունների:

«Դրանց աննախապայման իրականացումը կնպաստի երկրում ժողովրդավարության, մարդու իրավունքների եւ հիմնարար ազատությունների ընդլայնմանը՝ որպես կայուն բաղադրիչներ մեր անվտանգության եւ կայուն զարգացման համար»,- ասել է վարչապետը: