Յուրաքանչյուր մարդու համար իր կյանքը, սիրո պատմությունը ամենադժվար կամ ամենահետաքրքիր կամ յուրօրինակ պատմությունն է: Ես այս մարդկանցից մեկն եմ:
Անունս Կարեն է: Ծնվել եմ Հալեպ քաղաքում 1978 թ.: Դպրոցական ուսումս ստացել եմ Հալեպի ԼՆԳԿ վարժարանում և եղել եմ ՀԲԸՄ-ի (Հայ երիտասարդաց ընկերակցություն) սկաուտական և մարզական շարքերում: Մանկությունից աչքի եմ ընկել ակտիվությամբ և այդ իսկ պատճառով ստացել եմ սկաուտական մի շարք պաշտոններ: Վստահ, կզարմանաք, թե ինչու այսքան հիշեցի իմ դպրոցական և միութենական կյանքը… պատճառը կինս է: Նա նույնպես հաճախել է ԼՆԳԿ վարժարանը և եղել է ՀԵԸ-ի սկաուտական և մարզական անդամներից մեկը: Եվ չնայած մենք նույն թաղամասում էինք ապրում, ես առաջին անգամ նկատեցի նրան 1994 թվականին, իմ մանկության ընկերոջս ծննդյան օրը: Այդ օրը ճակատագրական էր: Երկու դպրոցականներ, կյանքից ոչինչ չէինք հասկանում, անգամ չէինք գիտակցում, որ կյանքում կան դժվարություններ: Այդ ժամանակ միայն մի բան քաջ գիտակցում էինք` մենք իրար համար ենք ծնվել և շարունակելու ենք այս կյանքը միասին:
Տարիներն անցան, և մենք մեծացանք: Ես դպրոցը ավարտեցի ու բանակ գնացի, իսկ Սոնան դպրոցն ավարտեց ու սովորեց տուրիզմի քոլեջում: Այդ տարիներին Սոնան նաև Սիրիայի լողի չեմպիոնն էր և ամեն օր լողավազան էր գնում երեխաներին մարզելու: Ես միշտ Սոնային ճանապարհում էի տանից քոլեջ, լողավազան կամ ակումբ: Հիմա, երբ հիշում եմ այդ օրերը, սիրտս նեղվում է այն մտավախությունից, որ միգուցե այնտեղ, ուր ապրել ենք և այն փողոցներով, ուր քայլել ենք, վիճել և հյուսել ենք երազներ փլատակի են վերածվել կամ չկան…
Զորացրվելուց հետո սկսեցի աշխատել հորս հետ: Սովորել էի արհեստը: Սոնան էլ աշխատում եր որպես մանկապարտեզի ուսուցչուհի մեր իսկ ավարտած դպրոցում:
2001 թվականին Հայաստանից հրավեր ստացանք մասնակցելու Համահայկական 2-րդ խաղերի բացմանը: Մեկնեցինք Երևան: Առաջին անգամ էինք Հայաստանում: Ես կարծում եմ այդ այցելությունը մեծ դեր ունեցավ մեր հետագա կյանքում:
2003 թ նշանվենցինք: Հալեպում ավանդույթ էր այն, որ նոր ընտանիքը պետք է կազմվի միայն սեփական, թեկուզ փոքրիկ, բայց անձնական տան մեջ: Մեզ չհաջողվեց ունենալ այդ տունը:
Հետո հասկացա, որ չեմ կարողանալու երջանկացնել իմ կյանքի ընկերոջը, չէր իրականանում մեր երազները, որոնց մասին 11 տարի շարունակ երազել էինք: Ես շատ հուսահատ վիճակում էի: Մի օր, ուժերս հավաքելով, որոշեցի բաժանվել Սոնայից:
Երբ այդ պահը եկավ, հանկարծ նա ասաց. «Եկուր երթանք այստեղէն: Եկուր տեղափոխուինք ուրիշ երկիր մը: Միասին սկսինք մեր կեանքը»: Լսելով Սոնայի խոսքերը՝ վերածնվեցի, սակայն ո՞ւր, ո՞րտեղ ենք գնալու: Մենք հոգնել էինք արաբական աշխարհից, իսկ Ամերիկա կամ Եվրոպա գնալու համար շատ մեծ գումար էր պետք: Քար լռություն… Մի պահ իրար աչքերի մեջ նայեցինք ու միասին ասացինք. «ՀԱՅՐԵՆԻՔ»:
Մտածեցի, արժե՞ փորձել: Բայց ի՞նչ ենք անելու այնտեղ, ի՞նչպես ենք սկսելու: Ես ծանոթ կամ բարեկամներ չունեմ: Եվ այդ պահին Սոնան նորից ոգևորեց ինձ՝ ասելով. «Շատ մի մտածէր, կարեւորը մենք իմանանք ինչ կ’ուզենք, յետոյ կամաց-կամաց ամեն ինչ կը լուծուի»:
2005 թվականի նոյեմբերի 1-ին ես Հայաստան տեղափոխվեցի և իմ մասնագիտությամբ գործ գտա և սկսեցի աշխատել: Մենք որոշեցինք ամուսնանալ: 2006 թվականի սեպտեմբերի 23-ին ամուսնացանք Հալեպում ու 10 օր հետո Երևան տեղափոխվեցինք:
Սկզբում շատ բարդ էր մեզ համար: Հարազատներ չունեինք այստեղ, մեր ընկերները շատ հեռու էին մեզանից: Սոնան դարձավ իմ աշխարհը, իսկ ես՝ Սոնայի աշխարհը, մինչև ունեցանք մեր նոր շրջապատը, նոր ընկերներն ու բարեկամները:
Շատ անգամներ ես հիասթափվեցի և մտածեցի վերադարձի մասին: Սակայն կինս ասում էր, պիտի մնանք այստեղ և մեր երեխաները այստեղ պիտի ծնվեն ու մեծանան, ու միշտ հիշում էր այս խոսքերը ... վերադարձի կամուրջները պետք է այրեք ու երբեք հետ չեք նայելու:
Անցել է արդեն 11 տարի: Ունենք երկու հրաշք երեխաներ`տղա և աղջիկ:
Ինչպես նշեցի, մեր ուրախությունը լիարժեք կլիներ, եթե մեր հարազատները, բարեկամները, ընկերները մեզ հետ լինեին, և 5 տարի առաջ այդ մեկը ևս իրականություն դարձավ: Սիրիայի, հատկապես Հալեպի ծանր պայմանների հետևանքով, մեր բոլոր հարազատները եկան և հաստատվեցին Երևանում:
Մենք շատ ուրախ ենք: Մեր կյանքը կայացել է: Ունենք ամուր ընտանիք և հավատում ենք, որ մի օր ունենալու ենք մեր սեփական տանիքը հայրենիքում:
Այս է մեր պատմությունը: Էջերն ու բառերը քիչ են ամբողջությամբ պատմելու մեր պատմությունը, սակայն շնորհակալ եմ Սոնայից` իմ կյանքի լավագույն ընկերոջը, իմ սիրուն, իմ արևին: Վստահ եմ, որ կարդալով այս էջերը, դուք նույնպես նկատեցիք, որ Սոնան ինձ միշտ նեցուկ է եղել, ճանապարհ է ցույց տվել, հորդորել է, որ չկոտրվեմ, չնեղվեմ, չհանձնվեմ: Կյանքը պայքար է, և մենք միասին ենք պայքարել: Կյանքը սեր է և առանց սիրո չես կարող ապրել: Ես ԵՐՋԱՆԻԿ ԵՄ, որ գտել եմ իմ կյանքի կեսին`Սոնային:
Մի ասացվածք կա. ամեն հաջողակ մարդու հետևում կա հզոր կին: Ես փոխեմ ու ասեմ, ամեն ԵՐՋԱՆԻԿ մարդու հետևում կանգնած է ԿԻՆ:
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: