Հայաստանի արտգործնախարար Էդվարդ Նալբանդյանը հայտարարել է, որ հայկական կողմը բանակցությունների ժամանակ երբեւէ չի քննարկել եւ չի քննարկի Ադրբեջանի կազմում ԼՂ ինքնավարության հարցը:
Այս մասին ՀՀ ԱԳ նախարարն ասել է այսօր Գերմանիայի ԱԳ նախարար, ԵԱՀԿ գործող նախագահ Ֆրանկ-Վալտեր Շտայնմայերի հետ Երեւանում կայացած համատեղ մամուլի ասուլիսի ժամանակ:
Հիշեցնենք, որ Սանկտ-Պետերբուրգի հանդիպումից հետո Ադրբեջանի նախագահ Իլհամ Ալիեւը, վերադառնալով Բաքու, հայտարարել էր, որ պատրաստ է քննարկել Ղարաբաղի ինքնավարության հարցը եւ որպես օրինակ բերել Նախիջեւանը՝ ասելով, որ Պետերբուրգում կայացած հանդիպմանը նաեւ այդ մասին են խոսել:
Այսօր նախարար Նալբանդյանն Ալիեւի այդ հայտարարությունը շինծու է անվանել:
Նրա խոսքով, Ադրբեջանն այսօր փորձում է ինչ-որ կերպ իր հանրությանը ցույց տալ, որ այդ պայմանավորվածություններն ի նպաստ իրենց են եղել:
«Չեմ կարծում, որ այդ մոտեցումը օգտակար կարող է լինել բանակցային գործընթացի համար: Ժամանակին հայաշատ Նախիջեւանն այսօր ամբողջովին հայաթափված է, հայկական մշակութային ժառանգությունը` ոչնչացված, եւ դա այսօր օրինակ է բերվում Ադրբեջանի ղեկավարի կողմից որպես հեռանկար Լեռնային Ղարաբաղի համար: Սա այն վառ ապացույցներից է, թե ինչու դա չէր կարող լինել բանակցությունների առարկա ու չի էլ լինի»,- նշել է Էդվարդ Նալբանդյանը:
Նալբանդյանը հիշեցրել է, որ եռանախագահող երկրներն ամենաբարձր մակարդակով բազմիցս հայտարարել են, որ ԼՂ կարգավիճակը պետք է որոշի ԼՂ ժողովուրդը ազատ կամարտահայտության միջոցով, որը կունենա միջազգային իրավական ուժ:
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: