Երեւան: Մեդիամաքս: ԵԱՀԿ ԶԼՄ-ների ազատության հարցերով ներկայացուցիչ Դունյա Միյատովիչն այսօր կոչ է արել Հայաստանի իշխանություններին պատասխանատվության ենթարկել լրագրողների հանդեպ ոտնձգություններ կատարած անձանց եւ վերջ դնել անպատժելիության մթնոլորտին:
Ահազանգերի համաձայն, սեպտեմբերի 19-ին Ղազախստանում հայկական համայնքի ղեկավարը Երեւանում կայացած Հայաստան-Սփյուռք համաժողովի ժամանակ խլել է «Հայկական ժամանակ» օրաթերթի լրագրողի ձայնագրիչը, երբ վերջինս մոտեցել է նրան: Այնուհետ, համայնքի ղեկավարը հանձնարարել էր իր անվտանգության աշխատակիցներին հեռացնել լրագրողին: Անվտանգության աշխատակիցները խլել են լրագրողի հեռախոսը, երբ վերջինս փորձել է լուսանկարել իր հանդեպ վերաբերմունքը:
«Ես մտահոգված եմ Հայաստանում լրագրողների նկատմամբ ոտնձգությունների վերջին դեպքերի կապակցւթյամբ: Հուսով եմ, որ լրագրողի հանդեպ բռնության այս դեպքը պատշաճ կերպով կուսումնասիրվի իրավապահ մարմինների կողմից»,- գրել է Դունյա Միյատովիչը Հայաստանի ԱԳ նախարար Էդվարդ Նալբանդյանին հասցեագրված նամակում:
ԵԱՀԿ ներկայացուցիչն անդրադարձել է նաեւ Ա1+-ի լրագրող Մարինե Խաչատրյանի եւ «Չորրորդ իշխանություն» թերթի լրագրող Անի Գեւորգյանի հանդեպ հարձակումների փաստին:
«Ես կոչ եմ անում իշխանությունների պատշաճ ժամկետում անդրադառնալ այս հանցագործություններին: Անպատժելիությունը հանգեցնում է ավելի մեծ բռնության ալիքի եւ բացասական է անդրադառնում ազատ մամուլի եւ ազատ արտահայտման վրա»,- ասել է Միյատովիչը:
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: