103562 դիտում

Հեռարձակման թվայնացումն ավարտվել է


Լուսանկարը` http://ud.kmvcity.ru/


Երեւան: Մեդիամաքս: Անալոգայինից թվային հեռուստահեռարձակման անցնելու գործընթացն ավարտված է։

Ինչպես հաղորդում են ՀՀ տրանսպորտի եւ կապի նախարարությունից, Հայաստանի ամբողջ տարածքում թվային հեռարձակումը հասանելի է:

Հայաստանում թվային հեռուստահեռարձակման ներդրման տեխնիկական աշխատանքները սկսվել են 2014թ. հունվարի 14-ից։

Աշխատանքներն իրականացրել է ՀՀ տրանսպորտի եւ կապի նախարարության «Հայաստանի հեռուստատեսային եւ ռադիոհաղորդիչ ցանց» ՓԲԸ-ն՝ «Էրիքսոն»» եւ «Ինթելսաթ» կազմակերպությունների հետ համատեղ։

«Հայաստանի հեռուստատեսային և ռադիոհաղորդիչ ցանց» ՓԲԸ-ի գլխավոր տնօրեն Գրիգոր Ամալյանն ասել է, որ կատարված աշխատանքները լիովին համապատասխանում են նախատեսված չափորոշիչներին:

Թվայնացումից հետո Երեւանում եւ մերձակա բնակավայրերում կհեռարձակվի թվային 18, իսկ մարզերում՝ 9 հեռուստաալիք:

Մասնագիտական որոշ գնահատականների համաձայն՝ թվային հեռուստատեսությունը 6 անգամ արդյունավետ է անալոգայինի համեմատ։

Անալոգային հեռուստահեռարձակման վերջնաժամկետը նախատեսված է 2016թ. հունվարի 1-ը:

«Մենք հունվարի մեկին դադարեցնելու ենք անալոգային հեռարձակումը, եթե այլ իրավական ակտ կամ այլ իրավական մոտեցում մինչ այդ օրինականացված չլինի ՀՀ-ում: Կարծում եմ՝ քաղաքացիները սարքը ձեռք բերելու խնդրի լուծումը չպետք է թողնեն վերջին օրվան, որովհետեւ դա կարող է շուկայում առաջացնել ծանրաբեռնվածություն»,- ասել է Գրիգոր Ամալյանը։

Ծրագրի ամբողջական արժեքը 6 մլրդ 922 մլն դրամ է:

Թվային հեռարձակման մասին մանրամասն կարող եք կարդալ այստեղ:

Կարծիքներ

Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում:

Մեր ընտրանին
banks.am
itel.am
sport
bravo.am