Սեպտեմբերի 23-ին եւ 24-ին Մատենադարանում տեղի ունեցավ Մեդիա նախաձեռնությունների կենտրոնի կազմակերպած «Թվապատում 2016» միջազգային մեդիա կոնֆերանսը, որի ընթացքում տեղացի եւ արտասահմանցի մեդիա-մասնագետները խոսեցին թվային միջավայրում լրագրողական պատմությունների վերաբերյալ: Գրի ենք առել կոնֆերանսի մասնակիցներից մի քանիսի մտքերը:
Դանիիլ Տուրովսկի
meduza.io (Լատվիա)
Հետաքննող լրագրող չեմ, ոչ էլ փաստաթղթերի հետ եմ աշխատում: Ճիշտ կլինի ասել, որ ստեղծում եմ մարդկային պատմություններ, բարձրաձայնում եմ մարդկանց խնդիրները: Երկու տարի առաջ սկսեցի ուսումնասիրել «Իսլամական պետության» թեման:
Ցանկացած տեքստ պետք է հետաքրքիր կարդացվի: Կարելի է ահռելի քանակությամբ ինֆորմացիա պեղել, լավ աղբյուրներ ունենալ, զրուցել մասնագետների հետ, բայց այդ ամենը բավարար չէ լավ նյութ ունենալու համար:
Լուսանկարը` Մեդիամաքս
Հետաքրքիր տեքստը վավերագրական պատմությունն է: Պիտի ունենաս հերոսներ, սցենար, շնչակտուր պահեր: Յուրաքանչյուր մանրուքը պիտի իսկական լինի: Կարելի է գրել՝ հաշվի առնելով Բունինի, Չեխովի պատմվածքների ձեւաչափը, բայց չմոռանալ, որ լրագրող ես:
Մարդկային պատմություն ստեղծելիս, անկախ նրանից, թե ով է հերոսդ, նրա հետ շատ ժամանակ ես անցկացնում ու երբեմն ընկերանում եք: Բայց դա խնդիր է, որովհետեւ լրագրողը պետք է կարողանա սահմանը չհատել:
Արա Թադևոսյան
Մեդիամաքսի տնօրեն
Այն ինչ անում ենք Մեդիամաքսում, «մարդակենտրոն լրագրություն» ենք անվանում: Մեր աշխատանքի հիմքում մարդն է: Չնայած մեզ թվում է, թե մարդու մասին արդեն ամեն ինչ վաղուց հայտնի է, իրականում այդպես չէ: Ամեն մարդ մի տիեզերք է, ում մասին կարելի է անվերջ պատմել: Ցանկացած պատմություն փորձում ենք մարդու միջոցով ներկայացնել:
Լուսանկարը` Մեդիամաքս
ՄԱԿ-ի Բնակչության հիմնադրամի հետ համատեղ իրագործել ենք «Իմ աղջիկը» նախագիծը, որով փորձել ենք ավելի մեծ ուշադրություն գրավել երեխայի սեռով պայմանավորված հղիության ընդհատման խնդրին: Արդյունքը գերազանցեց բոլոր սպասելիքները՝ ստացանք 122 շարադրություն: 122 հայրեր նկարագրեցին իրենց սերը դուստրերի հանդեպ: Այս նախագծի կարեւորությունն այն էր, որ մարդիկ ոչ թե միայն պայքարում էին հաղթելու եւ դրամական մրցանակներ ստանալու, այլ վայելում էին իրենց զգացմունքները նկարագրելու անսպասելի հնարավորությունը:
Վասիլի Գատով
Մեդիավերլուծաբան, լրագրող
Հարավային Կալիֆորնիայի Համալսարան
Ժամանակակից մեդիան 500 տարվա էվոլյուցիայի արդյունք է: Դա մի երեւույթ է, որ տեղի է ունենում մասնագիտության, հասարակության ու ամբողջ ինդուստրիայի անդադար փոխադարձ գործընթացի շնորհիվ:
Նորությունները դադարել են բացառիկ ապրանք լինելուց, որը միայն մեդիաներ էին առաքում: Ֆեյսբուքն ու Գուգլը շատ գործիքներ ներմուծեցին, որոնք օգնում են մի քանի վայրկյանում ծանոթանալ հիմնական նորություններին:
Լուսանկարը` Մեդիամաքս
Այսօր մեդիայում առկա հիմնական խնդիրն այն է, որ սպառողն արդեն գիտի, որ ազատ է ու կարող է չվճարել նորություններ ստանալու համար: Նա այլեւս չի վերադառնա այնտեղ, որտեղ պիտի վճարեր թերթեր, ամսագրեր ձեռք բերելու համար, կամ էլ գովազդներով լի հեռուստացույց դիտեր: Խնդիր է նաեւ այն, որ լրատվամիջոցները դադարել են տեխնոլոգիաների պատվիրատուներ լինել՝ խոսքս համացանցի մասին է:
Ծանոթներս նշել են մի քանի փաստեր, որոնք խնդիր են դարձել լրագրողների համար: Օրինակ, միջին սպառողը երեք րոպեից ավելի որեւէ նյութի վրա չի վատնում: Google-ում աշխատող գործընկերս պատմել է, որ Google News-ի օգտատերերի 34 տոկոսը կարդում է միայն նյութերի վերնագրերը:
Անուշ Բաբաջանյան
4plus.org (Հայաստան)
Ապրիլյան պատերազմն ու նրա հետեւանքները վավերագրելն ինձ համար չափազանց կարեւոր էր:
Լուսանկարը` Մեդիամաքս
Երկու պատճառ կա ֆոտոպատմությունն իրականացնելու համար: Նախ՝ անկախ տեղավայրից, թեման պիտի կարեւոր լինի, երկրորդն էլ՝ անձնական հետաքրքրությունն է: Իհարկե, կարիերայի մասին բոլորս էլ մտածում ենք, բայց նույնիսկ եթե շատ տեղային թվացող թեմա գտնեմ, բայց ինձ հետաքրքրի, կսկսեմ աշխատել դրա վրա:
Դժվար է պահել սահմանը՝ որպես պրոֆեսիոնալ լուսանկարիչ զարգանալու եւ լրագրողական էթիկան չխախտելու միջեւ: Պիտի հասկանաս, որն է քո իրական նպատակը՝ թե որպես լրագրող ու թե մարդ:
Սեդրակ Մկրտչյան
infographics.am
Infographics նախագիծը ձեւավորվեց անցյալ տարի, հավաքվեցինք տարբեր մասնագետներով ու սկսեցինք ստեղծել նյութեր, որոնց հիմնական նպատակը բովանդակությունը ֆունկցիոնալ հարմարավետ կերպով ներկայացնելն է:
Լուսանկարը` Մեդիամաքս
Ինֆոգրաֆիկան տվյալների տեղեկատվության գիտելիքների փոխանցման գրաֆիկական միջոցն է, որի նպատակն է արագ ու հստակ փոխանցել բարդ տեղեկատվությունը:
Լենա Գեւորգյան
Լուսանկարները՝ Մարիամ Լորեցյանի
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: