Երեւան: Մեդիամաքս: ՀՀ վարչապետ Կարեն Կարապետյանն ասել է, որ ապրիլի 2-ին կայանալիք ԱԺ ընտրությունները պետք է «սկզբունքորեն նոր որակ» ունենան:
Այդ մասին նա ասել է՝ հունվարի 12-ին ՀՀ արտաքին գործերի նախարարությունում հանդիպելով Հայաստանում հավատարմագրված դեսպանների, միջազգային կառույցների եւ կազմակերպությունների ղեկավարներին ու ներկայացուցիչների հետ:
«Մենք պատրաստակամ ենք անել ամեն ինչ, որպեսզի այս ընտրությունները լինեն թափանցիկ», - ասել է վարչապետը:
Կարեն Կարապետյանը կարեւորել է դիվանագիտական կորպուսի հետ նման ձեւաչափով պարբերական հանդիպումների անցկացումը՝ համագործակցության արդյունավետության բարձրացման նպատակով: Նա նշել է, որ կառավարությունը բաց է խորհուրդների, քննադատության, առաջարկությունների համար:
«Կարծում եմ, որ կառավարության թիմի անդամներն արդեն զգում են իրենց ոլորտների զարկերակները: Տնտեսական բլոկի հիմնական խնդիրն է՝ բիզնեսի համար մաքսիմալ հավասար, բաց եւ արդար պայմանների ստեղծումը: Մենք հայտարարել ենք, որ շատ փոփոխություններ պետք է անենք ու առաջին հերթին մենք պետք է փոխվենք»,- նշել է կառավարության ղեկավարը: Նա ասել է, որ ներդրումային միջավայրի բարելավման նպատակով նախատեսվում է հարկային եւ մաքսային վարչարարության գործընթացի պարզեցում եւ ամբողջական անցում էլեկտրոնային համակարգի, ինչը կնվազեցնի կոռուպցիոն ռիսկերը:
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: