Երեւան: Մեդիամաքս: Հայաստանի Հանրապետական կուսակցության (ՀՀԿ) ցուցակը գլխավորող պաշտպանության նախարար Վիգեն Սարգսյանն ասել է, որ «մենք ցանկանում ենք փոխել այն մեքենան, որը մեր տնտեսության շարժիչ ուժն է»:
Մրցակից կուսակցությունների խոստումները աշխատավարձերի ու թոշակների բարձրացման մասին նա համարել է «վտանգավոր տնտեսության ապագայի համար»:
«Բայց անգամ եթե ենթադրենք, որ հրաշք տեղի կունենա եւ այդ բոլոր միջոցները կգտնվեն, նման խոստումները ես համեմատում եմ հին, անսարք մեքենայի անվադողերը փոխելու ցանկության հետ: Իսկ մեր թիմն առաջարկում է ստեղծել նոր մեքենա», - մարտի 29-ին «Շանթ» հեռուստաընկերության եթերում ասել է Վիգեն Սարգսյանը:
Նա ասել է, որ Հայաստանի կառավարությունը վեց ամսվա ընթացքում «կտրուկ տարբերություն» է ապահովել եւ ապրիլի 2-ին ժողովրդի վստահությունը ստանալու դեպքում շարունակելու է զարգացնել հաջողությունները:
Մեկնաբանելով առաջարկները պրոֆեսիոնալ բանակին անցնելու վերաբերյալ, Վիգեն Սարգսյանը դրանք որակել է որպես «սադրանք՝ ուղղված մեր ազգային անվտանգության դեմ»: Նա մանրամասնել է, որ սպաների եւ պայմանագրային զինծառոյողների աշխատավարձերը եռապատկելու խոստումները իրատեսական չեն: Բացի դրանից, նկատել է նախարարը, անցումը զուտ պայմանագրային ծառայությունը փաստացի կկազմալուծի պահեստազորի ինստիտուտը:
Պաշտպանության նախարարն ասել է, որ ունի խորքային ծրագիր, որի մասին դիտավորյալ չի խոսել նախընտրական շրջանում: «Եթե մեր թիմը ապրիլի 2-ի ընտրություններում հաջողության հասնի, ապրիլի 15-ին հանրային լայն քննարկման կներկայացնեմ այդ ծրագիրը, որով նախատեսվում է մեծ առավելություններ տալ իրենց պարտքը առաջնագծում կատարող զինծառայողներին», - տեղեկացրել է Վիգեն Սարգսյանը:
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: