Երեւան: Մեդիամաքս: Քաղաքաշինության պետական կոմիտեն կղեկավարի Ավետիք Էլոյանը:
Այդ որոշումը կայացվել է այսօր կառավարության նիստում:
2016թ. հունվարին Մեդիամաքսին տված բացառիկ հարցազրույցում Ավետիք Էլոյանն ասել էր, որ «մեր ճարտարապետությունը պետք է ժամանակակից լինի եւ ապշեցնում է հինը կրկնօրինակելու մեր ձգտումը»։
Ավետիք Էլոյանը ծնվել է 1975 թվականին Երեւանում:
1992-1998 թթ. սովորել է Երեւանի Ճարտարապետաշինարարական ինստիտուտի Ճարտարապետության եւ քաղաքաշինության ֆակուլտետում
1997թ. Ֆրանսիայում անցել է ստաժավորում` «Մարսելի պատմական կենտրոնի վերակառուցման նախագիծ» ծրագրի շրջանակում:
1998թ. վերապատրաստվել է Հնդկաստանում Նյու Դելի մարդկային տարաբնակեցման ղեկավարման ինստիտուտում` ուսումնասիրելով քաղաքաշինության ղեկավարման հիմնախնդիրները:
1998-2000 թթ. սովորել է Մոսկվայի քաղաքաշինության գիտահետազոտական ինստիտուտում:
2001 թ. Երեւանի պետական Ճարտարապետաշինարարական համալսարանում պաշտպանել է թեկնածուական թեզ` ստանալով ճարտարապետական գիտությունների թեկնածուի գիտական աստիճան:
2016 թ. Կալիֆորնիայի ճարտարապետների պալատի կողմից ստացել է ճարտարապետական եւ քաղաքաշինական նախագծման արտոնագիր:
2017 թվականից անդամակցում է Ամերիկյան ճարտարապետների ինստիտուտին:
2001-2002 թթ. աշխատել է «Պողոսյան Հրաչ ճարտարապետական արվեստանոց»-ում` որպես ճարտարապետ, 2002-2006 թթ՝ Բար Հարբոր քաղաքում «Ռոք Քայվանո արքիթեքթս» արվեստանոցում` որպես ճարտարապետ:
2006-2008 թթ. աշխատել է Չիկագոյում` «Պապաջորջ-Հայմս փարթներս» նախագծային արվեստանոցում` որպես ճարտարապետ:
2008- 2012 թթ. աշխատել է Սան Ֆրանցիսկոյում` «Մաքդոնալդ արքիթեքթս» ճարտարապետական արվեստանոցում` որպես նախագծերի ղեկավար:
2012-2018 թթ. ԱՄՆ-ում հիմնադրել եւ ղեկավարել է «Էլոյան արքիթեքթս» ճարտարապետական արվեստանոցը:
Նախագծել է մի շարք կառույցներ Լոս Անջելեսում, Չիկագոյում, Սան Ֆրանցիսկոյում, Մոսկվայում եւ այլն: Առավել նշանակալի կառույցներն են «Սան Ֆրանցիսկո Բեյ բրիջ» կամուրջի (San Francisco Bay Bridge) մատույցները, «Պորտլանդ Միլուոկե» (Portland Milwaukie Light Rail Bridge) կամուրջը, Չիկագոյում «Ալտա Քեյ» բազմահարկ բնակելի շենքը:
Ամուսնացած է, ունի երեք երեխա:
Քաղաքաշինության պետական կոմիտեն 2014-ից նախագահող Նարեկ Սարգսյանը հրաժարական էր ներկայացրել հունիսի 8-ին։
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: