Երեւան: Մեդիամաքս: Սեպտեմբերի 2-ի երեկոյան Հայաստանի վարչապետ Նիկոլ Փաշինյանն իր ֆեյսբուքյան էջի ուղիղ եթերում պատասխանել է քաղաքացիներին հուզող հարցերին:
Մեդիամաքսն առանձնացրել է վարչապետի խոսքի հիմնական թեմաները:
Արտահերթ ընտրություններ կազմակերպելու մեխանիզմների մասին
Նիկոլ Փաշինյանը հիշեցրել է, որ գործող Սահմանադրությամբ ԱԺ արտահերթ ընտրությունների անցկացման մեխանիզմն այն է, որ վարչապետը պետք է հրաժարական տա, ինչից հետո խորհրդարանը երկու շաբաթվա ընթացքում երկու անգամ չընտրի նոր վարչապետ, որից հետո Ազգային ժողովը իրավունքի ուժով պետք է արձակվի:
«Ըստ էության, կառավարության ծրագրով, որն ընդունվել է խորհրդարանի կողմից, այս քաղաքական պայմանավորվածությունը հստակ արձանագրվել է: Սակայն Հայաստանի քաղաքացիները երաշխիքներ են ուզում առ այն, որ վարչապետի ենթադրվող հրաժարականից հետո իրենք նորից ստիպված չեն լինելու հեղափոխություն անել:
Կարծում եմ, որ անհրաժեշտության դեպքում Հայաստանի քաղաքացիները կանեն այդ հեղափոխությունը, բայց նաեւ մարդկանց այս ուղերձը ընկալելով, կարծում եմ, որ մենք պետք է ունենանք երաշխիքներ, որ հակաժողովրդական գործընթացներ ձեռնարկելու փորձեր չեն արվելու»,- ասել է Նիկոլ Փաշինյանը:
«Առաջին տարբերակի մասին արդեն խոսել եմ՝ պետք է իրականացվեն սահմանադրական փոփոխություններ, որտեղ խորհրդարանի արձակումը կարող է տեղի ունենալ նաեւ առանց վարչապետի հրաժարականի: Այսինքն, խորհրդարանը ինքն ընդունի ինքնալուծարման մասին որոշում: Սա ամենաերաշխավորված տարբերակներից մեկն է: Հիմա աշխատում ենք սահմանադրական փոփոխությունների վրա: Փաթեթը շուտով պատրաստ կլինի, եւ մենք այն կուղարկենք խորհրդարան»,- ասել է վարչապետը:
Արտահերթ ընտրությունների ժամկետի մասին
Վարչապետն ասել է, որ ընտրությունները պետք է կայանան ամենաուշը 2019 թվականի մայիսին կամ հունիսի առաջին տասնօրյակում:
Ամուլսարի ծրագրի մասին
Նիկոլ Փաշինյանը տեղեկացրել է, որ տեսչական մարմինները ստուգումներ են անցկացրել, որոնք թույլ են տալիս որոշակի միջանկյալ եզրակացության գալ, իսկ վերջնական եզրակացության գալու համար անհրաժեշտ է եւս մեկ միջազգային փորձաքննություն իրականացնել:
«Շատ կարեւոր է, որ այդ փորձաքննությունը իրականացնի միջազգային հեղինակավոր կազմակերպություն, որպեսզի արդյունքները ընդունելի եւ անառարկելի լինեն ոչ միայն ՀՀ կառավարության, այլեւ միջազգային հանրության համար, քանի որ սա չափազանց կարեւոր հարց է: Կառավարության որոշումը Ամուլսարի հետ կապված կարող է հիմնված լինել բացառապես անառարկելի փաստերի վրա», - ասել է վարչապետը:
Նիկոլ Փաշինյանն ասել է, որ «այս պահի դրությամբ այդպիսի փաստեր չկան»`«կան որոշակի խախտումներ, մտահոգություններ, որոնք արձանագրված են»:
Գազի եւ էլեկտրաէներգիայի սակագների մասին
Վարչապետն ասել է, որ ստեղծվել է աշխատանքային խումբ, որն ուսումնասիրում է գազի ու էլեկտրաէներգիայի սակագների հիմնավորումները։
«Պետք է ունենալ գազի եւ էլեկտրաէներգիայի արդյունավետ սակագին եւ վստահ լինել, որ այն ձեւավորվել է արդյունավետ շուկայական տրամաբանության շրջանակում», - ասել է Նիկոլ Փաշինյանը։
Պուտինի հետ նախատեսված հանդիպման մասին
Նիկոլ Փաշինյանը տեղեկացրել է, որ առաջիկայում մեկնելու է Մոսկվա՝ Ռուսաստանի նախագահ Վլադիմիր Պուտինի հետ հանդիպելու նպատակով:
«Երրորդ հանդիպումն եմ ունենալու Պուտինի հետ։ Մանրակրկիտ կքննարկենք մեր օրակարգի բազմաթիվ հարցեր», - ասել է կառավարության ղեկավարը։
«Չեմ ասում, որ բոլոր հարցերը լուծված են, բայց մեր համագործակցությունը շարունակվում է եւ համոզված եմ, որ բնականոն կերպով կշարունակվի»,- նշել է վարչապետը:
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: