Արեւը նույն ռեժիմում է գտնվել առնվազն 290 մլն տարի շարունակ, վկայում են հետազոտողների ուսումնասիրությունները:

Երկրագնդի Պերմյան ժամանակաշրջանի (ավարտվել է 251 մլն տարի առաջ) հնագույն ծառարմատների օղակները «գրանցել են» արեւային էներգիայի հոսքի ակտիվության 11 տարի տեւող շրջանները:

Ինչպես գրում է Sciencenews-ը, հնէաբանները Գերմանիայի հարավ-արեւելքում գտել են հրաբխային ժայթքումների տակ թաղված շուրջ 290 մլն տարեկան անտառի բեկորներ: Խեմնից քաղաքի Բնության պատմության թանգարանի հնէաբաններ Լյուդվիգ Լյութհարդտն ու Ռոննի Ռոսսլերը, չափելով օղակների լայնությունը, ինչը ցույց է տալիս, թե որքան է աճել բույսն ամեն տարի, որոշել են դրա աճի տեմպերը:

Արեւի փայլող ճառագայթները, արեւային բծերի ակտիվությունը եւ արեգակնային բռնկումները ամբողջական շրջան են կատարում յուրաքանչյուր մոտ 11 տարին մեկ:

Արեգակնային այս փոփոխությունները կարող են փոխել նաեւ արեւի` Երկիր մոլորակ հասնող լույսը: Որոշ գիտնականներ առաջ են քաշում այն հիպոթեզը, որ դրանք կարող են ազդել Մթնոլորտի վերին շերտի (ստրատոսֆերա) կազմի եւ ամպերի ձեւավորման տեմպի վրա, ինչը կարող է բերել մթնոլորտային տեղումների տեմպի փոփոխության, որն էլ իր հերթին կազդի ծառերի աճի վրա: Միեւնույն ժամանակ, արեւի ու ծառարմատի օղակների շրջափուլերի փոխկապակցվածությունը գիտականորեն ապացուցված չէ: