Երեւան: Մեդիամաքս: Ճարտարապետության եւ շինարարության Հայաստանի ազգային համալսարանում հուլիսի 2-ին տեսական ֆիզիկայի միջազգային ամառային դպրոց է մեկնարկել, որին մասնակցում են 50 մագիստրոս, ասպիրանտ եւ գիտությունների թեկնածու Հայաստանից, Իրանից, Վրաստանից, Թուրքիայից, Ռուսաստանից, Ուկրաինայից, Բրազիլիայից։

Դասախոսությունները վարում են Կրետեի, Բոննի համալսարանների, Լոնդոնի կայսերական քոլեջի, Պոտսդամի Ալբերտ Էյնշտեյնի ինստիտուտի մասնագետները:

Տեսական ֆիզիկայի բնագավառում ամառային դպրոցի նպատակը դասախոսությունների ու քննարկումների միջոցով երիտասարդ գիտնականներին եւ ուսանողներին մաթեմատիկական ու տեսական ֆիզիկայի վերաբերյալ նոր գիտելիքներ ու գաղափարներ փոխանցելն է։

4-օրյա ամառային դպրոցի կազմակերպիչներն են Հայ օգնության ֆոնդը (ՀՕՖ), Գիտության ու կրթության հայկական ազգային հիմնադրամը» (ԳԿՀԱՀ), ՅՈՒՆԵՍԿՈ-ի տեսական ֆիզիկայի միջազգային կենտրոնը, Ֆոլկսվագեն հիմնադրամի ֆինանսավորմամբ գործող Տարրական մասնիկների ֆիզիկայի տարածաշրջանային դոկտորական ծրագիրը։