Երեւան: Մեդիամաքս: Հայոց ցեղասպանության 100-րդ տարելիցի խորհրդանշան է ընտրվել անմոռուկ ծաղիկը, իսկ կարգախոս`«Հիշում եմ եւ պահանջում»:
Ինչպես հաղորդում է Մեդիամաքս-ը, այս մասին այսօր տեղեկացրել է ՀՀ նախագահի աշխատակազմի ղեկավար Վիգեն Սարգսյանը` ներկայացնելով Հայոց ցեղասպանության 100-րդ տարելիցին նվիրված միջոցառումները համակարգող տարածաշրջանային հանձնախմբերի հավաք-հանդիպման արդյունքները:
«Հայոց ցեղասպանության 100-րդ տարելիցին նվիրված միջոցառումները համակարգող հանձնաժողովի կողմից ստեղծված աշխատանքային խումբն անց է կացրել երկու փուլից բաղկացած մրցույթ, որին ներկայացվել են տասնյակ աշխատանքներ: Հանձնաժողովը հաստատել է այս խորհրդանիշը: Անմոռուկ ծաղիկը գրեթե բոլոր լեզուներում ունի նույն իմաստը` չմոռանալ, հիշել եւ հիշեցնել: Այդ է պատճառը, որ ընտրել ենք անմոռուկը: Այս խորհրդանշանն օգտագործվելու է 2015թ. ամբողջ ընթացքում»,- ասել է Վիգեն Սարգսյանը:
Նրա խոսքերով, ընտրված «Հիշում եմ եւ պահանջում»-ը անհատականացված կարգախոս է, որն արտացոլում է հայ ընտանիքների վերապրած ողբերգության պատմությունը եւ այն պահանջը, որը հայ ժողովուրդը ներկայացնում է համայն աշխարհին:
Հայոց ցեղասպանության 100-րդ տարելիցին նվիրված միջոցառումների, խորհրդանշանի եւ կարգախոսի մասին ավելին` տեսանյութում:
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: