Երեւան: Մեդիամաքս: Դիլիջանում ավարտվել է IDeA հիմնադրամի կողմից կազմակերպվող ամենամյա UWC Dilijan ամառային ճամբարը:

Երկու շաբաթ տեւած ճամբարին մասնակցել են 16-18 տարեկան պատանիներ Իտալիայից, Իսպանիայից, Շվեդիայից, Իսրայելից, Շվեյցարիայից, Կանադայից, Նորվեգիայից, Թուրքիայից, Հայաստանից, ԼՂՀ-ից եւ այլ երկրներից:

«Ամառային դպրոցի նպատակն էր հետազոտել, թե ինչպես կարող ենք ավելի խթանող երիտասարդական մշակույթ ստեղծել Դիլիջանում՝ համատեղելով տարբեր երկրներից ժամանած բազմաթիվ երիտասարդների փորձառությունները»,-Մեդիամաքս-ի հետ զրույցում ասել է UWC Dilijan դպրոցի տնօրեն Ջոն Փադըֆութը:

UWC Dilijan-ի տնօրենների խորհրդի նախագահ, դպրոցի համահիմնադիր Վերոնիկա Զոնաբենդը Մեդիամաքս-ի հետ զրույցում ասել է, որ Դիլիջանը կփոխվի այն ժամանակ, երբ տեղի բնակիչները պատրաստ կլինեն փոփոխությունների:

«Արդեն երկրորդ անգամ անցկացվող UWC Dilijan դպրոցի ամառային ճամբարին մասնակցում էին նաեւ տեղի երեխաները: Այս տարի երկու մասնակից ունեինք Թուրքիայից եւ հրավիրել էինք երկու երեխա Ղարաբաղից, քանի որ ճամբարի նպատակն է առավելագույն ինտեգրացիա ապահովել», - ասել է Վերոնիկա Զոնաբենդը:

Նա նաեւ հավելել է, որ դասընթացի վերջին օրերին ճամբարականներին միացել են եւս 15 պատանիներ Արցախից:

Ամառային ճամբարի համակարգող Էդրիան Բայելը հայտնել է, որ UWC Dilijan ամառային ճամբարը կենտրոնացած էր համայնքի զարգացման խնդրի վրա:

«UWC քոլեջների նպատակն է ոչ միայն ակադեմիական գիտելիքներ հաղորդել, այլեւ բազմակողմանի զարգացնել ուսանողի անհատականությունը: Կենտրոնացել ենք այն հարցի շուրջ, թե ինչը կարող է Դիլիջանը դարձնում գրավիչ, հարուստ եւ հետաքրքրական համայնք երիտասարդների համար: Ցավոք, այսօր երիտասարդների համար այս համայնքում շատ զբաղմունքներ չկան: Դասընթացի երկրորդ կեսին երեխաներն աշխատանքներ են իրականացրել հատուկ խմբակներում՝ երաժշտության, արվեստի, սպորտի եւ կինոյի, որոնք կարող են խթան հանդիսանալ համայնքային զարգացման համար», - ասել է ճամբարի համակարգողը: