Երեւան: Մեդիամաքս: Տաթեւի վանքի երգչախումբը՝ վանահայր Միքայել վարդապետ Գեւորգյանի եւ խմբավար Լուսինե Սարգսյանի ղեկավարությամբ, ապրիլի 12-18-ը Երեւան եւ Արագածոտնի մարզ կատարած ուխտագնացության շրջանակում մի շարք եկեղեցիներում մասնակցել է հոգեւոր արարողությունների, որոնց ընթացքում հանդես է եկել հոգեւոր երգերի կատարումներով:
Երգչախումբը ելույթ է ունեցել Աշտարակի Սբ. Մարինե, Օշականի Սբ. Մեսրոպ Մաշտոց, Օհանավանի Հովհաննավանք, Երեւանի Սբ. Երրորդություն եւ Արգավանդի Սբ. Սարգիս եկեղեցիներում, ինչպես նաեւ Ե. Չարենցի անվան գրականության եւ արվեստի թանգարանում:
«Զատկական տոներին հաջորդող այս շրջանում որոշեցինք Քրիստոսի հարության ավետիսի բարի լուրը փոխանցել մարդկանց եւ կազմակերպեցինք այս ուխտագնացություն-շրջագայությունը՝ «Հայաստանի զարգացման նախաձեռնություններ» (IDeA) հիմնադրամի հովանավորությամբ: Ելույթների ընթացքում ներկայացվել են Մեսրոպ Մաշտոցի եւ հայ նշանավոր վարդապետների շարականները, Կոմիտասի մշակումները: Հուսով ենք, որ բոլորը մեծ բավականություն ստացան: Երեխաները մեծ ոգեւորությամբ եւ սիրով այս օրերն անցկացրին տարբեր սրբավայրերում»,- ասել է Միքայել վարդապետ Գեւորգյանը:
Տաթեւի վանական համալիրի երգչախումբը ստեղծվել է 2013 թվականի տարեվերջին՝ «Հայաստանի զարգացման նախաձեռնություններ» (IDeA) հիմնադրամի կողմից իրականացվող «Տաթեւի վերածնունդ» ծրագրի շրջանակում: Երգչախմբում ընդգրկված են շնորհալի երեխաներ վանական համալիրի հարակից Հալիձոր, Տաթեւ, Շինուհայր, Սվարանց եւ Խոտ համայնքներից:
Երգչախումբն արդեն իսկ հանդես է եկել մի շարք եկեղեցիներում: Միքայել վարդապետ Գեւորգյանի ղեկավարությամբ կատարվել են ուխտագնացություններ նաեւ Էջմիածին, Երեւան եւ Արցախ:
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: