2015-16 թթ. մեր երկրում տեղի ունեցան մի շարք իրադարձություններ, որոնց շնորհիվ աշխարհում շատերն իմացան Հայաստանի, Հայոց ցեղասպանության եւ հայերի` մարդասիրությանն ուղղված ջանքերի մասին:
Դրանցից կարելի է առանձնացնել «Ավրորա» միջազգային մարդասիրական մրցանակաբաշխությունը (2016թ.), Քարդաշյանների այցը Հայաստան (2015թ.) եւ Ֆրանցիսկոս Պապի այցը Հայաստան (2016թ.):
Մարքեթինգի եւ հաղորդակցության ոլորտում համաշխարհային առաջատար Edelman ընկերությունն «Հայաստանի զարգացման նախաձեռնություններ» (IDeA) հիմնադրամի պատվերով իրականացրել է վերոնշյալ իրադարձությունների` ավանդական եւ սոցիալական մեդիայում լուսաբանման ծավալների համեմատական վերլուծություն: Բացի վերեւում թվարկված իրադարձություններից, Էդելման ընկերությունը համեմատական վերլուծության մեջ ներառել է նաեւ 2015 թ. Խաղաղության Նոբելյան մրցանակի հայտարարությունը:
Վերլուծության են ենթարկվել այն բացառիկ հոդվածները, որոնք հրապարակվել են տարբեր երկրների անգլիալեզու լրատվամիջոցներում, ներառյալ այնպիսի առաջատար պարբերականներն, ինչպիսիք են The Guardian-ը, The New York Times-ը, Forbes-ը եւ այլն:
Վերլուծությունը ներառում է հոդվածների ծավալների համեմատություն երկշաբաթյա ժամանակահատվածում` իրադարձությանը նախորդող եւ հաջորդող օրերին:
Խաղաղության Նոբելյան մրցանակ
«Ավրորա» մրցանակի հետ համեմատության մեջ գտնվող երեք իրադարձություններից լուսաբանման ծավալով առաջատարն է Խաղաղության Նոբելյան մրցանակը: Անգլիալեզու լրատվամիջոցներում այս թեմայով տպագրվել են 476 բացառիկ հոդվածներ: Հոդվածների մեծ մասը ենթադրություններ էին հավանական դափնեկրի վերաբերյալ, որոնց թվում նշվում էին Անգելա Մերկելը եւ Ֆրանցիսկոս Պապը: Հոդվածների մյուս մասն էլ հաղթողին ուղղված շնորհավորական ուղերձներ էին: Լուսաբանումը մեծամասամբ հիմնված է եղել մամուլի հաղորդագրությունների շրջանառության վրա:
Ֆրանցիսկոս Պապի այցը Հայաստան
Լուսաբանման ծավալով երկրորդն է Ֆրանցիսկոս Պապի այցը Հայաստան. անգլերեն լեզվով տպագրվել են 366 բացառիկ հոդվածներ: Լուսաբանումը հիմնականում է կենտրոնացած էր Հայաստանի եւ Թուրքիայի միջեւ դիվանագիտական հարաբերությունների խնդրի վրա, ինչպես նաեւ այն կանխատեսումների, թե Ֆրանցիսկոս Պապը կարտասանի արդյո՞ք «Ցեղասպանություն» բառը:
Լուսանկարը` Մեդիամաքս
Վերլուծության ենթարկված 366 հոդվածներից 120-ը հրապարակվել են հայկական լրատվամիջոցներում (անգլերեն լեզվով):
Քարդաշյանների այցը Հայաստան
2015-ին Քարդաշյանների Հայաստան այցի արդյունքում անգլիալեզու լրատվամիջոցներում հրապարակվեցին 206 բացառիկ հոդվածներ, որոնք մեծ ուշադրություն հրավիրեցին Հայաստանի եւ Հայոց Ցեղասպանության հարցի շուրջ: Լուսաբանման մեծ ծավալը պայմանավորված էր հատկապես սոցիալական մեդիայի ակտիվությամբ, քանի որ Քարդաշյանները հետեւորդների մեծ բանակ ունեն Twitter եւ Instagram սոցիալական ցանցերում: Հարկ է նշել, որ այս հոդվածների մեծ մասը կենտրոնացած էր ոչ այնքան այցի վրա, որքան Քարդաշյան ընտանիքի ամենօրյա հարաբերությունների վրա: Այցը մեծամասամբ լուսաբանում էին ժամանցային լրատվամիջոցները, մի քանի հոդվածներ հրապարակվել են նաեւ The New York Times, The Guardian, ABC News, The Telegraph եւ այլ հեղինակավոր լրատվամիջոցներում:
Լուսանկարը` Մեդիամաքս
Ի դեպ, 2015թ. ապրիլին մեդիա մոնտիտորինգի փորձագետ Մայք Շալջյանը հաշվարկել էր, որ PR արշավի դեպքում Քարդաշյան քույրերի` Հայաստան կատարած այցի առաջին երկու օրերի լուսաբանումը ամերիկյան հեռուստատեսությամբ եւ ռադիոյով կարժենար $ 36 507 929: Այդ մասին առավել մանրամասն կարող եք կարդալ այստեղ:
«Ավրորա» միջազգային մարդասիրական մրցանակաբաշխություն
«Ավրորա» մրցանակի մասին հրապարակվել են 126 բացառիկ հոդվածներ: Լուսաբանումը հիմնականում կենտրոնացած էր Ջորջ Քլունիի Հայաստանում գտնվելու, Մարգարեթ Բարանկիցեի դափնեկիր հռչակվելու եւ Հայոց Ցեղասպանության վրա: Չնայած լուսաբանման համեմատաբար քիչ ծավալին, այն բավականին նշանակալի էր, եւ հոդվածներում առկա էին մրցանակի բանալի հաղորդագրություններից (key message) նվազագույնը երկուսը:
Լուսանկարը` Aurora Prize
«Ավրորայի» լուսաբանումը, ի տարբերություն մյուս իրադարձությունների, ամենաշատն էր կենտրոնացած Հայաստանի եւ մարդասիրական նպատակների վրա:
«Ավրորա» մրցանակի լուսաբանման արդյունքներից են`
• յուրօրինակ լուսաբանում միջազգային հարթակում (հոդվածների 94%-ը պարունակում է 2 եւ ավելի key message);
• մոտ 90 հարցազրույցներ համահիմնադիրների, ընտրող հանձնաժողովի անդամներրի, մրցանակի թեկնածուների եւ VIP-հյուրերի հետ;
• մամուլի ասուլիս 80 լրագրողների մասնակցությամբ;
• 15,840 թվիթ (4,580 թվիթ եւ 11,095 ռեթվիթ) եւ մոտ 57.5 միլիոն օգտատերերի ներգրավում;
• 18,717 օնլայն հիշատակումներ:
Մարիամ Մանոյան
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: