Երեւան: Մեդիամաքս: Օգոստոսի 28-ին Հայաստանի նկարիչների միությունում բացվել է լուսանկարիչ Դավիթ Հակոբյանի «Պատմություններ Ճանապարհից» անհատական ցուցահանդեսը:

Ցուցահանդեսին ներկայացված են 40 աշխատանքներ թեմատիկ բաժիններով՝ պետությունների ղեկավարներ, Հայոց բանակ, հոգեւոր թեմա, սպորտ եւ բնապատկերներ:

2010 թվականից Դավիթ Հակոբյանը ՀՀ նախագահի անձնական լուսանկարիչն է:

«Քանի որ լուսանկարներս հրապարակվում են եւ շատերը դրանք արդեն տեսել են, փորձել եմ այս անգամ դրանք այլ կերպ ցույց տալ՝ ներկայացնելով արարողակարգից դուրս արված աշխատանքները», - ասել է նա:

«Յուրաքանչյուր լուսանկարը մի ճանապարհորդության մասին պատմող փոքրիկ պատմություն է: Ինձ համար կառանձնացնեմ «Նախագահը Հորդանան գետում» լուսանկարը», - պատմել է լուսանկարիչը:

Լուսանկարը` Մեդիամաքս

Դավիթ Հակոբյանն ասել է, որ իր նպատակն է պաշտոնական արարողությունների ընթացքում կարողանալ որսալ այնպիսի կադրեր, որոնցում պաշտոնյաները ներկայանում են հասարակության կողմից ստեղծված կարծրատիպերից դուրս:

Ցուցահանդեսին ներկայացված լուսանկարներն արվել են աշխատանքային գործընթացի տարբեր փուլերում:

«Պաշտոնական լուսանկարիչներին հաճախ պատկերացնում են սոսկ որպես

«ձեռքսեղմումներ նկարողների»: Այս ցուցահանդեսով փորձել եմ հակառակն ապացուցել», - ասել է Դավիթ Հակոբյանը:

Խորհրդանշական է, որ ցուցահանդեսի բացմանը ելույթ է ունեցել Հայաստանի ամենաճանաչված լուսանկարիչներից մեկը՝ Մարտին Շահբազյանը, որը երկար տարիներ աշխատել է Արմենպրեսում, եղել է ՀՀ նախագահի անձնական լուսանկարիչը:

Դավիթ Հակոբյանի «Պատմությունները ճանապարհից» ցուցահանդեսը բաց կլինի օգոստոսի 28 եւ 29-ին:

Լենա Գեւորգյան

Լուսանկարները՝ Մարիամ Լորեցյանի