Երեւան: Մեդիամաքս: ՀՀ տնտեսական զարգացման եւ ներդրումների նախարարի առաջին տեղակալ Գարեգին Մելքոնյանն այսօր ասել է, որ Հայաստանի եւ Եվրոպական Միության միջեւ նոր շրջանակային համաձայնագրի շուրջ բանակցություններն ընթանում են դրական եւ կառուցողական մթնոլորտում:
«Այս օրերին Երեւանում տեղի է ունենում համաձայնագրի Առեւտուր եւ ներդրումներ բլոկի չորրորդ բանակցային փուլը: Կարող եմ ասել, որ սեղանին դրված փաստաթղթի զգալի մասը համաձայնեցվել է»,- ասել է փոխնախարարը Երեւանում մեկնարկած «ԵՄ-ն բիզնեսի համար» միջոցառումների շրջանակում:
Գարեգին Մելքոնյանի խոսքով՝ դեռեւս կան «զգայուն հարցեր, որոնք նեղ մասնագիտական են եւ քննարկումների կարիք ունեն»:
Այդուհանդերձ, փոխնախարարը վստահություն է հայտնել, որ լուծումներ կարող են գտնել:
Խոսելով համաձայնագրի ստորագրման ժամկետների մասին՝ Գարեգին Մելքոնյանը նկատել է, որ «ամենակարեւորը փաստաթղթի բովանդակությունն է»:
Հայաստանում ԵՄ պատվիրակության ղեկավար, դեսպան Պյոտր Սվիտալիսկին էլ նշել է, որ «բանակցվող համաձայնագրի քաղաքական մասի եզրագիծը քիչ թե շատ տեսանելի է, իսկ այսօր հիմնական աշխատանքները տարվում են տնտեսական մասով»:
ՀՀ-ԵՄ համաձայնագրի շուրջ Մեդիամաքսի հարցազրույցը Գարեգին Մելքոնյանի հետ կարող եք կարդալ այստեղ:
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: