Երեւան: Մեդիամաքս: Եվրամիության Հետազոտության, գիտության եւ նորարարության հարցերով հանձնակատար Կարլոս Մոեդասն երիտասարդ հայ գիտնականներին ներկայացրել է ԵՄ «Հորիզոն-2020» ծրագիրը:
Կարլոս Մոեդասն ընդգծել է, որ Եվրոպան գիտության եւ նորարարությունների ասպարեզում առաջնորդվում է բաց տարածքների սկզբունքով:
«Գիտությունն ու նորարարությունը վերջին հարյուրամյակում փոխել են աշխարհը: Գիտությունն այլեւս միայն գիտնականինը չէ. գիտությունն ու նորարարությունն այսօր մոտեցել են շարքային քաղաքացուն: «Հորիզոն-2020» ծրագրի նպատակն է՝ համախմբել եվրոպական տարածքի լավագույն գիտական միտքը եւ նորարարական գաղափարները»,-նշել է ԵՄ հանձնակատարը:
Նա վստահություն է հայտնել, որ Հայաստանի երիտասարդ գիտնականները կարող են իրենց լուման ներդնել՝ Եվրոպան ավելի բաց դարձնելու գործընթացում:
«Ձեզ պետք է հմտանալ «Հորիզոն-2020» ծրագրի մասնակցության մրցութային հայտեր լրացնելու գործում: Անհրաժեշտ է աշխատանքներ տանել համապատասխան մասնագետներ պատրաստելու ուղղությամբ»,- ասել է Կարլոս Մոեդասը:
Երեւանում Կարլոս Մոեդասն այցելել է նաեւ Մատենադարան եւ «Թումո» կենտրոն:
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: