Երեւան: Մեդիամաքս: Երեւանում այսօր մեկնարկել է «Ընդդեմ գենդերային բռնության 16-օրյա ակտիվության քարոզարշավ»-ը:

Հայաստանում ՄԱԿ-ի մշտական համակարգող Բրեդլի Բուզետտոն ներկայացրել է Եվրոպայի խորհրդի, ԵԱՀԿ-ի, Հայաստանում Մեծ Բրիտանիայի եւ ԱՄՆ դեսպանատների, ՄԱԿ-ի կողմից ընդունված համատեղ հայտարարությունը:

«Կանանց եւ աղջիկների նկատմամբ բռնությունը համարվում է մարդու իրավունքների ամենալուրջ խախտումներից մեկը: Հայաստանում գենդերային եւ հատկապես՝ ընտանեկան բռնությունը լուրջ մարտահրավեր է: 2016թ. առաջին կիսամյակում հարուցվել է ընտանեկան բռնության 373 դեպք, որից 7-ը եղել է մահվան ելքով»,- հայտնել է նա:

Բրեդլի Բուզետտոյի փոխանցմամբ՝ միջազգային հանրությունը դրական է գնահատում Հայաստանում ընտանեկան բռնության խնդրի հաղթահարման ոլորտում գրանցած առաջընթացը:

«Գենդերային բռնության խնդիրը հնարավոր չէ լուծել միայնակ: Միջազգային հանրությունը պատրաստ է աջակել Հայաստանի կառավարությանը ստեղծել այնպիսի միջավայր, որտեղ կանայք կլինեն հասարակության հավասար անդամներ եւ արժեքավոր ներդրողներ այս երկրի զարգացման համար»,- հայտնել է ՄԱԿ-ի ներկայացուցիչը:

Հայաստանում Եվրոպական Միության պատվիրակության ղեկավարի ժամանակավոր պաշտոնակատար Դիրկ Լորենցն էլ հայտնել է, որ ԵՄ-ն Հայաստանում իրականացնում է մարդու իրավունքների բյուջետային աջակցության ծրագիր, որն ուղղված է խտրականության եւ բռնության դեմ պայքարին:

«Մենք ֆինանսավորում ենք Հայաստանին՝ բարեփոխումներ կատարելու եւ հատկապես՝ ընտանեկան բռնության դեմ օրենքն ընդունելու համար»,- ասել է ԵՄ պաշտոնյան՝ հույս հայտնելով, որ օրենքի ընդունման գործընթացը առաջիկայում նոր թափ կստանա:

ՀՀ վարչապետի օգնական Արամ Վարդեւանյանն էլ նշել է, որ Հայաստանում կանանց իրավունքների մասով առկա են բավական լուրջ հիմնախնդիրներ, որոնք կարելի է կանխարգելել անհրաժեշտ օրենսդրական երաշխիքներ ստեղծելով:

Նա վստահություն է հայտնել, որ կառավարությունն այդ ուղղությամբ աշխատանքներ կիրականացնի:

«Ընդդեմ գենդերային բռնության 16-օրյա ակտիվության քարոզարշավ»-ը կշարունակվի մինչեւ դեկտեմբերի 10-ը:

Քարոզարշավի շրջանակում ՄԱԿ-ի հայաստանյան գրասենյակը եւ Մեդիամաքսը հայտարարել են «Իմ կինն իմ ընկերն է» շարադրությունների մրցույթ: