Ճարտարապետների պալատը կստեղծի «խաղի հավասար կանոններ» - Mediamax.am

3239 դիտում

Ճարտարապետների պալատը կստեղծի «խաղի հավասար կանոններ»


Լուսանկարը` Lea from Armenia


Երեւան: Մեդիամաքս: ՀՀ Ճարտարապետների միության նախագահ Մկրտիչ Մինասյանն այսօր ասել է, որ Հայաստանում «Ճարտարապետական գործունեության մասին» օրենքի առկայությունն անհրաժեշտություն է:

Այս մասին նա ասել է` լրագրողներին ներկայացնելով 2016թ. դեկտեմբերի 1-ին կառավարության կողմից հաստատված եւ Ազգային ժողովի քննարկմանը ներկայացված օրենքի նախագծի գլխավոր գործառույթները:

 

Օրենքի ընդունմամբ ստեղծվելու է «Հայաստանի ճարտարապետների պալատ» ոչ առեւտրային հաստատությունը, որի գործունեությունը կանոնակարգվելու է ինքնակարգավորման սկզբունքով:

 

Պալատն իրականացնելու է ճարտարապետների արտոնագրման եւ գրանցման, էթիկայի կանոնների հաստատման եւ մի շարք այլ գործառույթներ:

 

«ճարտարապետների պալատը դառնալու է ճարտարապետների միության ժառանգորդը: Այն իրավական հիմքով կարգավորելու է ճարտարապետների, կառուցապատողների, պետության հարաբերությունները»,- ասել է միության նախագահը:

 

Մկրտիչ Մինասյանի փոխանցմամբ՝ կարեւոր է ունենալ միասնական օրենք, որը խաղի նույն կանոնները կսահմանի դաշտում գործող բոլոր ճարտարապետների համար:

 

Ճարտարապետների միության վարչության անդամ Սաշուր Քալաշյանն էլ ընդգծել է, որ այս օրենքով ճարտարապետն ավելի պաշտպանված կդառնա:

 

Միության պատասխանատու քարտուղար Բորիս Քոչարյանն էլ հավելել է, որ օրենքով ճարտարապետը պաշտպանված կլինի կառուցապատողների կամայականություններից: Նրա խոսքով՝ իր տարբերություն միության, պալատն իրավասու կլինի իր վրա վերցնել շրջակա միջավայրի ստեղծման վերաբերյալ ողջ պատասխանատվությունը:

 

Բորիս Քոչարյանն ընդգծել է, որ այսօր միությունը դա չի կարող անել, քանի որ դաշտում գործող ճարտարապետներն անկախ են եւ իրենց չեն ենթարկվում:

 

«Պալատի ստեղծմամբ այդ հարցերը, եթե ոչ կատարյալ կերպով, ապա գոնե մասամբ կկարգավորվեն»,- հույս է հայտնել Բորիս Քոչարյանը:

Կարծիքներ

Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում:




Մեր ընտրանին