Երեւան: Մեդիամաքս: Եվրոպայի Խորհրդի քրեական վիճակագրության տարեկան զեկույցի համաձայն, Հայաստանում կալանավորների թիվը շարունակում է աճել։

Այսօր հրապարակված զեկույցում ասվում է, որ Հայաստանը դասվում է այն երկրների շարքին, որտեղ վերջին տասը տարիների ընթացում անազատության մեջ գտնվողների թիվը ամենաշատն է աճել։

2015թ.  Հայաստանում ընդհանուր առմամբ եղել է 3 888 կալանավոր, այսինքն, յուրաքանչյուր 100 հազար բնակչին բաժին  է հասնում 129.7 կալանավոր, ինչը բարձր է ԵԽ-ի միջին ցուցանիշից (115.7)։

ԵԽ-ում նշել են, որ 2005 թվականից սկսած այս ցուցանիշը Հայաստանում աճել է 48%-ով։

«Այսպիսով՝ Հայաստանը Թուրքիայի (191%), Ալբանիայի (90%), Սան Մարինոյի (79%), եւ Մակեդոնիայի (61%) հետ միասին դասվում է այն երկրների շարքին, որտեղ վերջին 10 տարիներին անազատության մեջ գտնվողների թիվն ամենաշատն է աճել»,- նշված է զեկույցում։

Հայաստանում կալանավորների թիվն ընդհանուր առմամբ աճել է 38%-ով։

Զեկույցում ասվում է նաեւ, որ Հայաստանում կալանավայրերի վարչակազմին հատկացված բյուջեն 2013թ. կազմել է 14 664 610 եվրո։ Ըստ այդմ՝ յուրաքանչյուր կալանավորի համար օրական ծախսվում է 10.3 եվրո, ինչը գրեթե 5 անգամ քիչ է ԵԽ-ի միջին ցուցանիշից (52.36 եվրո)։

ԵԽ-ում նաեւ արձանագրել են, որ Հայաստանի կալանավայրերում մահացության մակարդակն ամենաբարձրն է։