Երեւան: Մեդիամաքս: ՄԱԿ-ի առողջության իրավունքի հարցերով հատուկ զեկուցող Դայնիուս Պուրասն այսօր հայտարարել է, որ Հայաստանի իշխանությունները պետք է ակտիվացնեն ջանքերը՝ արձագանքելու երկրի առողջապահական համակարգում առկա մարտահրավերներին եւ անհավասարություններին:
Այս մասին ասված է զեկույցում, որը ներկայացվել է Դայնիուս Պուրասի՝ Հայաստան կատարած մեկշաբաթյա այցի ավարտին։
«Հայաստանն իրականացրել է մի շարք գովելի բարեփոխումներ, սակայն մարդկանց ֆիզիկական եւ հոգեկան առողջության իրավունքի իրացումը դեռեւս բախվում է մի շարք լուրջ մարտահրավերների՝ կապված առողջապահության նկատմամբ հնացած մոտեցումների եւ շարունակական անհավասարությունների խնդրի հետ»,-ասել է փորձագետը։
Նրա խոսքով՝ Հայաստանն առաջընթաց արձանագրելու լավ հնարավորություններ ունի, սակայն կան կառուցվածքային եւ համակարգային մարտահրավերներ թե՛ օրենսդրական, թե՛ գործնական դաշտերում:
«Առողջապահության ոլորտի պետական ծախսերը ՀՆԱ-ի 2%-ից ցածր են, սա աշխարհի ամենացածր ցուցանիշներից է»,- ասել է Դայնիուս Պուրասը։
«Երկիրը շարժվում է դեպի պարտադիր առողջապահական ապահովագրության համակարգ, որտեղ բնակչության կոնկրետ խմբերի, հիմնականում՝ քաղաքացիական ծառայողների եւ սոցիալապես անապահով խմբերի համար վերանայված արտոնությունների մասով որպես երրորդ կողմ հանդիսացող կառավարիչներ կներառվեն մասնավոր ապահովագրողները։ Սա կարող է լուրջ հետեւանքներ ունենալ համակարգում ներառվելու իրավասության, ընդգրկման եւ ֆինանսավորման տեսանկյունից. հավանական են անհավասարություններ եւ անարդյունավետ գործառնություններ, եթե չապահովվի ուժեղ վերահսկողություն եւ թափանցիկություն»,- հավելել է փորձագետը։
Նա Հայաստանի իշխանություններին կոչ է արել «հրաժարվել հոգեկան առողջության հնացած քաղաքականություններից եւ ծառայություններից, որոնք հիմնվում են մեծ հոգեբուժական հիվանդանոցների եւ երկարաժամկետ խնամք տրամադրող հաստատությունների վրա»։
Փորձագետը կոչ է արել Հայաստանին առանձնակի ուշադրություն դարձնել այնպիսի խմբերի կարիքների բավարարմանը, ինչպիսիք են երեխաները, միգրանտները, թմրադեղեր օգտագործողները, հաշմանդամություն ունեցողները՝ ապահովելու «Կայուն զարգացման 2030 օրակարգով» սահմանված առողջապահական թիրախների ձեռքբերումը։
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: