Երեւան: Մեդիամաքս: ՀՀ նախագահ Սերժ Սարգսյանը Գիրք նվիրելու օրվա կապակցությամբ այսօր այցելել է «Բուկինիստ» գրախանութ:
Նախագահն այստեղ հանդիպում է ունեցել «Էդիթ Պրինտ», «Զանգակ», «Անտարես» հրատարակչությունների ղեկավարների եւ «Բուկինիստ»-ի տնօրեն Խաչիկ Վարդանյանի հետ:
Քննարկվել են գրքի տպագրության եւ վաճառքի, ընթերցանության խրախուսման նպատակով պետության եւ մասնավոր հատվածի համագործակցության արդյունքում իրականացված աշխատանքներն ու հետագա ծրագրերը:
Հրատարակիչներն առաջարկություններ են ներկայացրել, որոնք նախագահը խոստացել է քննարկել եւ փորձել գտնել ոլորտին օգտակար լինելու նոր հնարավորություններ:
Սերժ Սարգսյանն ընդգծել է, որ անցած տարիների ընթացքում հասարակության մեջ ձեւավորված բարի ավանդույթը՝ Գիրք նվիրելու օրը, մեծ պոետի՝ Հովհաննես Թումանյանի ծնունդը նշելու ամենալավ ձեւերից մեկն է:
Օրվա խորհրդի կապակցությամբ նախագահը նվիրել է բրիտանացի պատմաբան Նիալ Ֆերգյուսոնի հեղինակած «Քաղաքակրթություն. ինչով է տարբերվում Արեւմուտքը մնացած աշխարհից» գիրքը:
«Բուկինիստ»-ի տնօրենը նախագահին ներկայացրել է գրավաճառ ցանցի գործունեության արդյունքում վերջին տարիներին արձանագրված հաջողությունները, ցանցի ընդլայնման եւ հատկապես մարզերում գրախանութների հիմնման ուղղությամբ իրականացվելիք առաջիկա ծրագրերը:
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: