Երեւան: Մեդիամաքս: Ծխելու դեմ պայքարի շարժումն այսուհետեւ կընթանա հանրության շրջանում հավանության արժանացած պատկերանշանով։

Փետրվարի 21-ին այն պաշտոնապես ներկայացրել է Առողջապահության ազգային կենտրոնի տնօրեն Ալեքսանդր Բազարչյանը։

«Դոպինգ» ընկերության հիմնադիր տնօրեն Հայկ Սիմոնյանի խոսքով` խորհրդանշանի ստեղծման գաղափարը ծնվել է 2017թ. մայիսի վերջին, երբ առողջապահության նախարարությունը Ծխախոտի դեմ պայքարի միջազգային օրվա շրջանակներում կազմակերպվող միջոցառումների ընթացքում շեշտեդրում էր պասիվ ծխողներին ծխից զերծ պահելու անհրաժեշտությունը։

«Ստեղծարար այս խումբն իսկապես նորարարական մոտեցում է ցուցաբերել եւ ներքին համոզվածությամբ ու հոգի դնելով է այս գործն արել»,-ասել է Ալեքսանդր Բազարչյանը։

Խորհրդանշանի ստեղծման գաղափարախոսությունը ներկայացվել է «Դոպինգ» կազմակերպության նկարահանած տեսահոլովակով։ 

Հայաստանում ծխում է բնակչության 27,9 տոկոսը, մնացած 72,1 տոկոսը հասարակական վայրերում եւ տներում դառնում են պասիվ ծխողներ։ Հաշվի առնելով ճանապարհային երթեւեկության նշանների նկատմամբ զգուշավորության բարձր մակարդակը` մուտքն արգելող նշանի վրա արտահայտվել է ծխողների եւ պասիվ ծխողների տոկոսային համակցությունը։ Արդյունքում ստեղծվել է հասարակական վայրերում ծխելն արգելող այս նշանը։

Պատկերանշանը 2017թ. նոյեմբերին կայացած Երեւանի արտաքին գովազդի փառատոնում արժանացել է մրցանակի։ Հեղինակները պատրաստվում են պատկերանշանը ներկայացնել նաեւ այլ գովազդային հեղինակավոր փառատոների։