Երեւան: Մեդիամաքս: ՀՀ արտակարգ իրավիճակների նախարար Հրաչյա Ռոստոմյանն այսօր այցելել է Արմավիրի եւ Արագածոտնի մարզեր՝ Հակակարկտային հրթիռային պաշտպանության պիլոտային ծրագրի շրջանակներում տեղադրված հրթիռային կայանների ու հրթիռների փորձարկմանը հետեւելու նպատակով:

Հրթիռների փորձարարական կրակոցները հաջող են անցել, նախորդ փորձարկման ժամանակ արձանագրված խնդիրները վերացվել են, իսկ մեծ տրամաչափի փողից կրակոցի իրականացման ժամանակ արձանագրվել են աննշան տարբերություններ:

Արմավիրի մարզի Ակնալիճ, Արագածոտնի մարզի Ոսկեվազ եւ Արտաշավան համայնքներում տեղադրված հրթիռային 3 կայանները հակակարկտային պաշտպանության տակ կառնեն Արմավիրի մարզի 33, Արագածոտնի մարզի 26 եւ Կոտայքի մարզի 1 համայնք:

Հրթիռային պաշտպանության համակարգի գործարկումից, 120 հրթիռների օգտագործումից եւ արդյունքների ամփոփումից հետո համապատասխան որոշում կկայացվի հրթիռային պաշտպանության ընդլայնման վերաբերյալ: