Երեւան: Մեդիամաքս: Սննդամթերքի անվտանգության պետական ծառայությունը մայիսի 21-ից կսկսի ժամկետանց սննդամթերքի եւ մակնշման խնդիրներ ունեցող ապրանքների հայտնաբերման եւ դրանք իրացումից դուրս բերման դիտարկում:
Ինչպես հաղորդում է Մեդիամաքս-ը, այսօր այս մասին լրագրողներին հայտնել է ծառայության պետ Աբրամ Բախչագուլյանը:
“Որոշվել է դիտարկումը սկսել փուլային տարբերակով: Նախ եւ առաջ դիտարկվելու է ռիսկային խմբում ընդգրկված սննդամթերքը՝ կաթնամթերք, մսամթերք եւ մանկական սնունդ: Դիտարկումը կսկսվի մարզերից, քանի որ հ/կ-ները պնդում են, որ այնտեղ վիճակն ավելի վատթար է, քան Երեւանում”,- նկատել է ծառայության պետը:
Աբրամ Բախչագուլյանի խոսքով, դիտրակման արդյունքում ժամկետանց սննդամթերքն իրացման ցանցից կհանվի եւ կոչնչացվի: Թերի մակնշված եւ կասկածելի սննդամթերքը կհանվի իրացման ցանցից եւ կուղարկվի լաբորատոր փորձաքննության:
Ծառայության պետի խոսքով, փորձնականորեն ներդրվել է ներկրվող սննդամթերքների նկատմամբ պետական վերահսկողության համակարգ: Սննդամթերքի անվտանգության պետական ծառայության պիլոտային ծրագրով, snund.am կայքում տեղադրվել են ՀՀ ներկրվող բոլոր ապրանքների տվյալները, եւ ցանկացած սպառող, մուտքագրելով շտրիխ-կոդը, կարող է տեսնել ապրանքի արտադրման եւ դրա պիտանելիության իրական ժամկետը:
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: