Երեւան: Մեդիամաքս: ՀՀ ԱԳՆ մամուլի խոսնակ Տիգրան Բալայանը «պարզունակ մանիպուլացիա» է որակել Թուրքիայի ԱԳՆ արձագանքը «Փերինչեքն ընդդեմ Շվեյցարիայի» գործով ՄԻԵԴ-ի կայացրած որոշման վերաբերյալ։
Ինչպես հաղորդում են ՀՀ ԱԳՆ մամուլի ծառայությունից, Տիգրան Բալայանն այս մասին ասել է` ի պատասխան News.am լրատվական կայքի հարցին:
«Թուրքիայի արտգործնախարարության արձագանքն էժանագին շահարկում է, որում, հիմնվելով Մարդու իրավունքների եվրոպական դատարանի երկրորդ պալատի 2013թ. դեկտեմբերի 17-ի որոշման վրա, դատողություններ են արվում նույն գործով ՄԻԵԴ ս.թ. հոկտեմբերի 15-ի որոշման վերաբերյալ։ Սա պարզունակ մանիպուլացիա է»,- ասել է ՀՀ ԱԳՆ մամուլի խոսնակը:
Հիշեցնենք, որ Թուրքիայի ԱԳՆ-ն մասնավորապես հայտարարել էր. «Թուրքիան, որը ներգրավված էր այս գործում որպես երրորդ կողմ, ողջունում է դատարանի վճիռը, որը համապատասխանում է մեր տեսակետներին: Մենք դիտարկում ենք այս վճիռը որպես շատ հստակ ազդանշան՝ ընդդեմ «ցեղասպանությունը» որպես միակ եւ բացարձակ ճշմարտություն պարտադրելու, ինչպես նաեւ այն անգամ հարցականի տակ դնելն արգելող բոլոր փորձերի»:
ՀՀ Գլխավոր դատախազությունն էլ հայտարարել էր, որ Հայաստանի կառավարության՝ «Դողու Փերինչեքն ընդդեմ Շվեյցարիայի» գործով ՄԻԵԴ ներկայացրած բոլոր պահանջները բավարարվել են:
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: