Երեւան: Մեդիամաքս: Եվրոպայի խորհրդի խորհրդարանական վեհաժողովը (ԵԽԽՎ) այսօր կողմ քվեարկեց Սարսանգի ջրամբարի վերաբերյալ զեկույցի բանաձեւի ընդունմանը:
Բոսնիան եւ Հերցեգովինան ներկայացնող պատգամավոր Միլիցա Մարկովիչի հեղինակած «Ադրբեջանի սահմանամերձ շրջանների բնակիչները միտումնավոր զրկված են ջրից» խորագրով զեկույցի բանաձեւի օգտին կողմ է քվեարկել 98, դեմ՝ 71 պատգամավոր:
Զեկույցը պատրաստելիս Միլիցա Մարկովիչը երկու անգամ այցելել էր Ադրբեջան, սակայն չէր այցելել Լեռնային Ղարաբաղ՝ չնայած ԼՂՀ իշխանությունների գրավոր առաջարկությանը: Արդյունքում ներկայացվել էր զեկույց մի ջրամբարի մասին, որը զեկուցողը նույնիսկ չէր տեսել:
Զեկույցը ԵԽԽՎ լիագումար նստաշրջանին ներկայացնելիս Միլիցա Մարկովիչը նշել է, թե իր հեղինակած զեկույցը հետապնդում է «բացառապես հումանիտար նպատակներ»:
Նիստի ընթացքում ԵԽԽՎ-ում ՀՀ պատվիրակության անդամ Արմեն Ռուստամյանը նշել է, որ զեկույցը չի կարող օբյեկտիվ համարվել եւ ընդունվել, քանի որ հեղինակը չի այցելել Սարսանգի ջրամբար: Արմեն Ռուստամյանն առաջարկել է զեկույցը լրամշակման համար հետ ուղարկել ԵԽԽՎ սոցիալական հարցերի հանձնաժողով, սակայն ԵԽԽՎ անդամները դեմ են քվեարկել այս առաջարկությանը:
Այսօր՝ ավելի վաղ, ԵԽԽՎ-ն չէր ընդունել բրիտանացի պատգամավոր Ռոբերտ Ուոլթերի հեղինակած «Բռնությունների աճը Լեռնային Ղարաբաղում եւ Ադրբեջանի գրավյալ այլ տարածքներում» զեկույցի բանաձեւը:
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: