Ինֆրակարմիր քվանտային կետերը հեղափոխություն են «խոստանում» - Mediamax.am

47793 դիտում

Ինֆրակարմիր քվանտային կետերը հեղափոխություն են «խոստանում»


Լուսանկարը` http://www.nersc.gov


Ինֆրակարմիր լույսի որոշ կարճալիքային հաճախականությունների համար կենսաբանական հյուսվածքներն ապակու նման թափանցիկ են: Հետազոտողներն այժմ ստեղծել են փոքր մասնիկներ՝ քվանտային կետեր, որոնք կարող են ներարկվել մարմնի մեջ եւ այնտեղից հատուկ հաճախականությամբ ինֆրակարմիր լույս ճառագայթել:

Ըստ հետազոտողների՝ սա կարող է հեղափոխական լինել եւ նոր ճանապարհ բացել մարմնի ներքին կառուցվածքի, ինչպես օրինակ՝ արյան անոթների ցանցի մանրամասն պատկերներ ստանալու համար:

 

Այս նոր մեթոդը մշակել են MIT-ի գիտաշխատող Օլիվեր Բրանսը, քիմիայի պրոֆեսոր Մունգի Բավենդին եւ 21 այլ հետազոտողներ, որոնց հոդվածը տպագրվել է Nature Biomedical Engineering ամսագրում:

 

Կիսահաղորդչային նյութերով պատրաստված այս նանոբյուրեղները լույս են արձակում, որի հաճախականությունը կարող է ճշգրիտ կարգավորված լինել մասնիկների կազմի եւ չափի վերահսկման միջոցով:

 

Հետազոտողների նպատակն է եղել զարգացնել քվանտային կետերի տարբերակներ, որոնց արտանետումները համապատասխանում են ցանկալի կարճալիքային ինֆրակարմիր հաճախականություններին, եւ որոնք կլինեն բավականաչափ պայծառ, որպեսզի դրանք հնարավոր լինի հեշտությամբ գտնել մաշկի կամ մկանային հյուսվածքների տակից:  

 

Մունգի Բավենդին ասել է, որ թիմի ստեղծած քվանտային մասնիկներն այնքան պայծառ են, որ դրանց լուսարձակումները կարելի է նկարել շատ կարճ ճառագայթման ժամանակ:

 

«Դա թույլ է տալիս ոչ միայն գեթ մեկ լուսանկար, այլեւ տեսանյութ անել, որը ֆիքսում է շարժման մանրամասները, ինչպես օրինակ՝ արյան հոսքը, միեւնույն ժամանակ հնարավորություն տալով տարբերակել երակներն ու զարկերակները»,- ասել է պրոֆեսորը:

 

Այս մեթոդում կիրառվում է հատուկ մշակված տեսախցիկ, որը խիստ զգայուն է ինֆրակարմիր լույսի կարճալիքային կոնկրետ դիապազոնի (1000 -2000 նանոմետր) համար:

 

Պատրաստեց Մարի Թարյանը

Կարծիքներ

Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում:




Մեր ընտրանին