Երեւան: Մեդիամաքս: Երեւանը զբաղեցրել է 182-րդ տեղը ամերիկյան Mercer ընկերության կողմից կազմված կյանքի որակի վարկանիշում:

Վարկանիշում ներկայացված է 230 քաղաք՝ բոլոր մայր ցամաքներից:

Առաջին հինգ տեղերը զբաղեցրել են համապատասխանաբար Վիենան, Ցյուրիխը, Օքլանդը (Նոր Զելանդիա), Մյունխենն ու Վանկուվերը:

Հետխորհրդային քաղաքներից Երեւանն առաջ է անցել Թբիլիսիից (188), Մինսկից (190), Բաքվից (197), Տաշկենտից (205), Բիշքեկից (210) եւ Դուշանբեից (212):

Մոսկվան ցուցակում զբաղեցրել է 167-րդ տեղը, իսկ Ալմաթին եւ Կիեւը կիսել են 176-րդ հորիզոնականը:  

Անձնական անվտանգության առանձին վարկանիշում Երեւանը զբաղեցրել է 166-րդ տեղը:

Վարկանիշը կազմելիս Mercer-ի մասնագետները ուսումնասիրում են կյանքի պայմանները ավելի քան 450 քաղաքներում: Փորձագետները վերլուծում են 39 գործոններ՝ դասակարգված 10 խմբերով.

1.Քաղաքական ու սոցիալական վիճակ (քաղաքական կայունություն, հանցավորություն, իրավապահ մարմիններ):

2. Տնտեսական վիճակ (տարադրամի փոխարժեքի կառավարում, բանկային ծառայություններ):

3. Սոցիալ-մշակութային վիճակ (ԶԼՄ-ների հասանելիություն եւ գրաքննություն, անձնական ազատությունների սահմանափակումներ):

4. Բժշկություն եւ առողջապահություն:

5. Դպրոց եւ կրթություն (ստանդարտներ եւ միջազգային դպրոցների առկայություն):

6. Հասարակական ծառայություններ եւ տրանսպորտ (էլեկտրականություն, ջուր, հասարակական տրանսպորտ):

7. Ժամանց (ռեստորաններ, թատրոններ, կինոթատրոններ, սպորտային կենտրոններ):

8.Սպառողական ապրանքներ:

9. Բնակարանային պայմաններ (բնակարանների վարձակալություն, կենցաղային տեխնիկա, կահույք, սպասարկում):

10. Շրջակա միջավայր: