Երեւան: Մեդիամաքս: Հայաստան-ՆԱՏՕ Անհատական գործընկերության գործողությունների ծրագրի շրջանակում նոյեմբերի 14-18-ը Հայաստանում կանցկացվի հերթական՝ 10-րդ «ՆԱՏՕ-ի շաբաթ»-ը:

«ՆԱՏՕ-ի շաբաթ» միջոցառումների մեկնարկը կտրվի նոյեմբերի 14-ին՝ ժամը 11:00-ին, Հայաստանում ՆԱՏՕ-ի տեղեկատվական կենտրոնում Հայաստան-ՆԱՏՕ գործընկերության վերաբերյալ մամուլի ասուլիսով:

Նույն օրը՝ ժամը 14:00-ին, Երեւանի «Դաբլթրի Հիլթոն» հյուրանոցում կկայանա «Կանայք զինված ուժերում» թեմայով աշխատաժողովը:

Նոյեմբերի 15-ին՝ ժամը 11:00-ին, կկայանա այցելություն ՀՀ զինված ուժերի Խաղաղապահ բրիգադ: Նույն օրը՝ ժամը 16:00-18:00-ը, ՀՀ ԱԳՆ-ում կկայանա Կոսովոյում եւ Աֆղանստանում միջազգային խաղաղության հաստատման գործողություններին մասնակցող հայ խաղաղապահների եւ նրանց ընտանիքների համար ավանդական հեռուստակամուրջը:

Նոյեմբերի 16-ին՝ ժամը 09:30-17:30-ը, Երեւանի «Կոնգրես» հյուրանոցում տեղի կունենա «Կիբեր անվտանգության կարողությունների զարգացում» թեմայով աշխատաժողովը՝ կիբեր անվտանգության ոլորտի փորձագետների համար (աշխատանքային լեզուն՝ անգլերեն):

Նոյեմբերի 17-ին՝ ժամը 09:45-17:30-ը, ՀՀ Գիտությունների ազգային ակադեմիայում կանցկացվի «Գիտություն հանուն խաղաղության եւ անվտանգության» տեղեկատվական օրը:

Նոյեմբերի 18-ին Երեւանի պետական համալսարանում տեղի կունենա հանդիպում համալսարանի ուսանողների եւ պրոֆեսորադասախոսական կազմի հետ: