Հարավային Կովկասում եւ Կենտրոնական Ասիայում ՆԱՏՕ-ի գլխավոր քարտուղարի հատուկ ներկայացուցիչ Ջեյմս Ապատուրայն այսօր ասել է, որ դաշինքի եւ Հայաստանի հարաբերությունների զարգացման համար «որեւէ քաղաքական խոչընդոտներ չկան»:
Ջեյմս Ապատուրայն այսօր հանդիպել է լրագրողներին Երեւանում ՆԱՏՕ-ի Տեղեկատվական կենտրոնում: Մեդիամաքսը ներկայացնում է ասուլիսի հիմնական դրվագները:
Հայաստանի եւ ՆԱՏՕ-ի հարաբերությունների մասին
Այն ողջ ընթացքում, որ ես զբաղեցնում եմ այս պաշտոնը, Հայաստանի եւ ՆԱՏՕ-ի հարաբերությունները զարգացել են կայուն եւ հաստատակամ կերպով, եւ դա շարունակվում է: Հայաստանի նախագահի, արտաքին գործերի եւ պաշտպանության նախարարների հետ իմ այսօրվա հանդիպումները վկայում են, որ Հայաստանի արտաքին քաղաքական եւ պաշտպանական առաջնահերթությունները չեն փոխվել:
Մենք շնորհակալ ենք Հայաստանի ժողովրդին՝ Աֆղանստանի եւ Կոսովոյի խաղաղապահ գործողություններում ձեր երկրի էական մասնակցության համար:
Ջեյմս ԱպատուրայըԼուսանկարը` Մեդիամաքս
Ուրախ ենք տեսնել, որ Հայաստանը չի սահմանափակվում միայն ՆԱՏՕ-ի կողմից ղեկավարվող գործողություններով եւ մասնակցում է նաեւ ՄԱԿ-ի հովանու ներքո իրականացվող գործողություններին:
Կոռուպցիայի դեմ պայքարի մասին
Առաջին ուղերձը, որը ստացանք Հայաստանի նոր կառավարությունից՝ ի դեմս պաշտպանության նախարար Դավիթ Տոնոյանի, այն էր, որ իշխանությունները պատրաստ են ակտիվ միջոցներ ձեռնարկել զինված ուժերում թափանցիկության ավելացման եւ կոռուպցիայի դեմ պայքարելու համար: Մենք պատրաստ ենք շարունակել աջակցել այդ ջանքերին եւ քննարկել աջակցության հնարավոր ընդլայնումը:
Սիրիայում Հայաստանի մարդասիրական առաքելության մասին
ՆԱՏՕ-ն այս թեմայով դիրքորոշում չի հայտնել եւ, անկեղծ ասած, չեմ կարծում, որ կհայտնի:
Ջեյմս ԱպատուրայըԼուսանկարը` Մեդիամաքս
Այսօր քննարկել ենք այդ հարցը Հայաստանի պաշտպանության եւ արտաքին գործերի նախարարների հետ, եւ ես լսեցի նրանց դիրքորոշումը հայկական համայնքի համար այդ առաքելության կարեւորության մասին:
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: