Երեւան: Մեդիամաքս: ՀՀ կառավարությունն այսօրվա նիստում որոշել է 2017թ. դեկտեմբերից իրականացնել մարդու պապիլոմա վիրուսային վարակի դեմ պատվաստումներ:

Պատվաստումը կիրականացվի 13 տարեկան աղջիկների շրջանում՝ 2 դեղաչափ սխեմայով, 6 ամիսը մեկ, որը համահունչ է Առողջապահության համաշխարհային կազմակերպության պաշտոնական դիրքորոշման հետ:

ՀՀ առողջապահության նախարար Լեւոն Ալթունյանի խոսքով՝ պատվաստումը պապիլոմավիրուսային վարակի դեմ պայքարի միջոցառումներից մեկն է՝ ի լրումն սքրինինգային հետազոտությունների. այն հնարավորություն կտա էականորեն նվազեցնել հիվանդացության եւ մահացության դեպքերը:

Նախարարի խոսքով՝ Հայաստանում կանանց քաղցկեղային հիվանդությունների կառուցվածքում արգանդի պարանոցի քաղցկեղը երկրորդ տեղում է՝ կրծքագեղձի քաղցկեղից հետո, եւ այս վիրուսով Հայաստանը դասվում է բարձր հիվանդացություն ունեցող երկրների շարքում:

Մասնավորապես, Հայաստանում տարեկան գրանցվում է հիվանդացության միջինում 250-300 նոր դեպք, ընդ որում, դրանք հայտնաբերվում են բավական ուշ փուլերում: Տարեկան մահացության քանակը կազմում է 100-130 կին: 2015-ին արձանագրվել է մահվան 127, իսկ 2016-ին՝ 116 դեպք:

«Մարդու պապիլոմա վիրուսների դեմ պատվաստումներն ունեն բարձր արդյունավետություն, նույնիսկ մեկ դեղաչափ պատվաստումը 80-85% դեպքերում առաջացնում է հակամարմինների պաշտպանիչ մակարդակ, ինչը համարվում է բարձր արդյունավետության ցուցանիշ»,- ընդգծել է Լեւոն Ալթունյանը:

Պատվաստումները կիրականացվեն ԳԱՎԻ (Պատվաստումների եւ պատվաստանյութերի գլոբալ դաշինք) հիմնադրամի գրանտային ծրագրի օժանդակությամբ: Կազմակերպությունը երկու տարվա ընթացքում կտրամադրի պատվաստանյութը եւ պատվաստումների օժանդակ պարագաները, ինչպես նաեւ ծրագրի ներդրման համար նախապատրաստական միջոցառումների մի մասի ծախսերը: 2019-ից սկսած՝ Հայաստանն իր վրա կվերցնի պատվաստանյութի ձեռքբերման ծախսերը:

Պատվաստումների 1 դեղաչափը Հայաստանի համար կարժենա $ 4,5, այն դեպքում, երբ դրա շուկայական արժեքը կազմում է $ 100:

Նախատեսվում է պատվաստել 16 հազ. 13 տարեկան աղջիկների, պատվաստումը կմեկնարկի դեկտեմբերի երկրորդ տասնամյակին եւ կավարտի 2018թ. առաջին կիսամյակին: