Երեւան: Մեդիամաքս: Երեւանյան «Նեմո» դելֆինարիումում այսօր վերջին ներկայացումներն են լինելու: Այս մասին Մեդիամաքս-ի թղթակցին հայտնել է դելֆինարիումի տնօրեն Լիլիթ Սահակյանը:
Տնօրենը նշել է, որ դելֆինարիումը փակ կլինի մինչ հոկտեմբեր. «Դելֆիններին պետք է տեղափոխեն Ռուսաստանի Դաշնություն` հյուրախաղերի, հոկտեմբերին կրկին կվերադառնան»,-ասել է նա:
Մեդիամաքս-ի հարցին` ո՞ր քաղաքներում են լինելու հյուրախաղերը, Լիլիթ Սահակյանը պատասխանել է` «Դեռ հստակ չէ»: Անդրադառնալով շշուկներին, թե երեւանյան դելֆինարիումում համապատասխան պայմաններ չկան ջրային կենդանիների համար` մեր զրուցակիցն ասել է. «Նման խնդիր չկա: Մեկ տարուց ավել է` դելֆինարիումն աշխատում է, նման խնդիրը, առկայության դեպքում, ավելի շուտ ի հայտ կգար»: Նա նշել է, որ դելֆիններին տեղափոխելը սեփականատերերի ցանկությունն է:
Երևանյան դելֆինարիումը պատկանում է ուկրաինական «Ներում» կազմակերպությանը, որը մի շարք դելֆինարիումներ ունի Ռուսաստանի և Ուկրաինայի տարածքում:
«Նեմո» դելֆինարումը գործում է 2010-ի դեկտեմբերից: Դելֆինարիումում այսօր կա 4 դելֆին եւ երկու փոկ:
Մեդիամաքս-ը նշում է, որ բնապահպանական մի շարք կազմակերպություններ պայքարում էին դելֆինարիումի գործունեության դեմ` պահանջելով դրա փակումը:
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: