Երեւան: Մեդիամաքս: Թուրք մտավորական, Սաբանչի համալսարանի դասախոս, «Հայե՛ր, ներեցեք մեզ» ակցիայի նախաձեռնող Չենգիզ Աքթարը հայտարարել է, որ Թուրքիան, հրաժարվելով ճանաչել Հայոց ցեղասպանությունը, տանուլ է տվել ճշմարտության համար պայքարում:
«Այլեւս ոչ ոք չի հավատում այդ պարզունակ ժխտողականությանը: Կմախքն այնքան մեծ է, որ այն այլեւ չի վերադառնա պահարան»,- AFP-ին ասել է թուրք մտավորականը:
Միեւնույն ժամանակ` Չենգիզ Աքթարը նշել է, որ Թուրքիային պակասում է հեռատես առաջնորդը, որը պատրաստ է լուծել այս խնդիրը: Նրա խոսքով` գլխավոր խնդիրներից մեկը կապված է կրթության հետ, քանի որ շատ թուրքեր պարզապես չգիտեն, թե ինչ է տեղի ունեցել, եւ ոմանք «հայ» բառն օգտագործում են որպես վիրավորանք:
«2015թ. կառավարության միակ նպատակն է նվազեցնել իր կորուստները»,- նշել է թուրք մտավորականը:
Նրա խոսքով՝ Թուրքիայում իրական վախ կա, որ հայերի ժառանգները կարող են 1915թ. կորցրած տարածքների հանդեպ պահանջներ ներկայացնել:
«Այս ամենից բացի, փաստ է, որ ժամանակակից Թուրքիան կառուցված է Անատոլիայում բնակված ոչ մուսուլմանների վտարման եւ ոչնչացման վրա: Առաջ բերելով այս հարցը՝ մենք հարցականի տակ ենք դնում թուրք ազգի հիմնասյուները, ինչն այժմ անհնար է»,- ասել է Չենգիզ Աքթարը:
Նա նշել է, որ վերջին հարցումների համաձայն, թուրքերի 9%-ը կողմ է Ցեղասպանության ճանաչմանը:
«Ջինն արդեն դուրս է եկել շշից: Փոփոխությունը կլինի դանդաղ, բայց այն կլինի: Ես հավատում եմ դրան»,- գրել է նա:
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: