Երեւան: Մեդիամաքս: Նոյեմբերի 5-ից 12-ը Եվրոպայում սովորական զինված ուժերի (ԵՍԶՈՒ) մասին պայմանագրի շրջանակներում Հայաստանի զինված ուժերի տեսչական խմբի կողմից Թուրքիայի տարածքում անցկացվում են հայտարարված վայրերի տեսչություններ:

Տեսչության առարկաներն են (հսկողության օբյեկտներ)` Թուրքիայի ԶՈՒ 3-րդ դաշտային բանակի 9-րդ բանակային կորպուսի Արդահանում եւ Սարիղամիշում տեղակայված բրիգադները:

Տեսչության ընթացքում կստուգվեն պայմանագրով սահմանափակվող տեխնիկայի եւ սպառազինության (մարտական տանկեր, մարտական զրահապատ մեքենաներ, հրետանի) քանակը եւ դրանց առկայությունը հսկողության օբյեկտներում:

Մեդիամաքս-ը հիշեցնում է, որ 2012թ. նոյեմբերի 26-ից դեկտեմբերի 3-ը ՀՀ պաշտպանության նախարարության տեսչական խումբը տեսչության էր ենթարկվել Թուրքիայի 3-րդ դաշտային բանակի 9-րդ բանակային կորպուսի 14-րդ մեխանիզացված հետեւակային բրիգադը (Կարս) եւ 1-ին մոտոհրաձգային բրիգադի 5-րդ սահմանապահ գունդը (Իգդիր):