Երեւան: Մեդիամաքս: ՀՀ պաշտպանության նախարար Սեյրան Օհանյանն այսօր ասել է, որ Հայաստանը ոչ միայն կշարունակի խաղաղապահ գործունեությունը Աֆղանստանում, այլեւ բանակցում է Լիբանան ուղարկվելիք իր խաղաղապահների թվի շուրջ:
Այս մասին Սեյրան Օհանյանն ասել է այսօր` պատասխանելով Մեդիամաքս-ի հարցին:
«Խաղաղապահ գործունեությունը մեր միջազգային ռազմական համագործակցության կարեւոր ուղղություններից է: Դրանով հաստատում ենք, որ Հայաստանն ունակ է մասնակցել միջազգային խաղաղության, կայունության ապահովման գործընթացներին»,- ասել է նախարարն լրագրողների հետ հանդիպման ժամանակ:
Սեյրան Օհանյանը տեղեկացրել է, որ «մենք Աֆսղանստանում շարունակելու ենք նույն ձեւաչափով իրականացնել մեր խաղաղապահ գործունեությունը»:
Բացի այդ, նախարարի խոսքերով, այսօր բանակցությունների փուլում է գտնվում Լիբանան գործուղման ուղարկվելիք հայ խաղաղապահների թվի հարցը:
«Փորձի փոխանակման, առաջատար չափանիշների տիրապետման, տարբեր երկրներում իրադրության ուսումնասիրման արդյունքում մենք բարձրացնում ենք մեր Զինված ուժերի փոխգործունակ լինելու կարողությունը, ինչը հետագայում կնպաստի մեր երկրի անվտանգության ապահովման խնդիրների կատարմանը»,- ասել է Սեյրան Օհանյանը:
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: