Երեւան: Մեդիամաքս: ՀՀ կրթության եւ գիտության նախարար Լեւոն Մկրտչյանն ընդունել է Save the childeren միջազգային կազմակերպության հայաստանյան ներկայացուցչության պատվիրակությանը եւ «Նախաձեռնություն հանուն երեխայի առողջության եւ կրթության» ծրագրի աջակից` «Մեդիկոր» հիմնադրամի ծրագրի պատասխանատու Ռիկուս Ջասոմետիին:

«Շատ կարեւոր է, երբ միջազգային հասարակական կազմակերպությունները Հայաստանում հետեւողական եւ արհեստավարժ գործունեություն են ծավալում: Այն մեծ աշխատանքը, որ դուք իրականացնում եք նախադպրոցական կրթության զարգացման եւ ներառականության տարածման ուղղությամբ, կարեւոր եւ հեռանկարային գործընթաց է եւ համահունչ է մեր այսօրվա կրթական քաղաքականությանը»,- ասել է Լեւոն Մկրտչյանը:

Ռիկուս Ջասոմետին ընդգծել է, որ երկրորդ անգամ լինելով Հայաստանում` կոնկրետ դրական տեղաշարժեր է նկատում:

«Այսօր ես վերադարձել եմ Գեղարքունիքի մարզի Գետաշեն համայնքից, որտեղ գործում է դպրոցահեն նախակրթարանը, եւ շատ տպավորված եմ: Այստեղ, անշուշտ, նաեւ մեր կազմակերպության աջակցությամբ աշխատանքներ են տարվում ոչ միայն երեխաների, այլ նաեւ նրանց ծնողների հետ. գործում է ծնողական ռեսուրս կենտրոնը»,- նշել է Ռիկուս Ջասոմետին:

Անդրադառնալով ներառականության տարածման խնդրին` Լեւոն Մկրտչյանը նշել է, որ հասարակության շրջանում դեռեւս թյուրըմբռնում կա:

«Ներառականությունը շատերի պատկերացմամբ հաշմանդամ երեխաների ինտեգրում է սովորական հանրակրթական դպրոցներ, որոնք էլ պետք է հարմարեցված լինել հաշմանդամներին: Այնինչ, համընդհանուր ներառականության ապահովում է ցանկացած տիպի կարիք ունեցողի ինտեգրումը միջավայրին, օրինակ, ինչով ներառականություն չէ սիրիահայ երեխաների ինտեգրումը մեր հասարակությանը եւ դպրոցական կյանքին, կամ ասենք բացառիկ կարողություններով օժտված երեխայի ինտեգրումը իր հասակակիցների շրջանում»,-ասել է նախարարը:

Այս համատեքստում Լեւոն Մկրտչյանը կարեւորել է ուսուցչի օգնականի հաստիքի ներդրումը, որը ներառվել է հաջորդ տարվա պետբյուջեի նախագծում:

Save the childeren հայաստանյան ներկայացուցչության ծրագրերի իրականացման գծով ավագ ղեկավար Իռեն Սարգսյանը տեղեկացրել է, որ առաջիկայում կազմակերպությունը մտադիր է ընդլայնել գործունեության շրջանակը: