Երեւան: Մեդիամաքս: ՀՀ նախագահ Սերժ Սարգսյանն ասել է, որ Իտալիան Հայաստանի համար կարեւոր է որպես ԵՄ առաջատար երկիր, որի հետ համագործակցության զարգացումը շարունակում է ծանրակշիռ տեղ զբաղեցնել Հայաստանի արտաքին քաղաքական օրակարգում։
Այս մասին ՀՀ նախագահն ասել է Իտալիայի վարչապետ Մատեո Ռենցիի հետ Նյու Յորքում կայացած հանդիպման ժամանակ:
Սերժ Սարգսյանը հույս է հայտնել, որ Իտալիան կշարունակի աջակցել ՀՀ-ԵՄ ընթացիկ օրակարգի իրականացմանը:
ՀՀ նախագահը կարեւորել է 2012-ից սկսված ռազմական փոխգործակցությունը` հիշեցնելով, որ անցյալ նոյեմբերից 32 հայ խաղաղապահ ՄԱԿ-ի խաղաղապահ ուժերի իտալական հրամանատարության ներքո ծառայություն է իրականացնում Լիբանանում: Սա, ըստ ՀՀ նախագահի, կարելի է համարել հայ-իտալական համագործակցության հաջողված օրինակ։
Վերջին չորս տարիներին ավելացել են նաեւ Հայաստանի եւ Իտալիայի միջեւ առեւտրաշրջանառութան ծավալները:
Սա, կողմերի համոզմամբ, վկայում է ավելի լավ արդյունքների հասնելու լուրջ ներուժի մասին, որի ուղղությամբ անհրաժեշտ է ակտիվ ջանքեր ներդնել:
2014թ. ցուցանիշով Իտալիան ԵՄ երկրների շարքում Հայաստանի երկրորդ առեւտրային գործընկերն է:
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: