Երեւան: Մեդիամաքս: ՀՀ ԱԳՆ մամուլի խոսնակ Տիգրան Բալայանն այսօր ասել է, որ ԼՂ հարցով Հայաստանի եւ Ադրբեջանի արտգործնախարարների հանդիպման վերաբերյալ այս պահի դրությամբ հստակ պայմանավորվածություն չկա։

Մեդիամաքսը հիշեցնում է, որ ԵԱՀԿ Մինսկի խմբի համանախագահները հունիս 12-14-ը Հայաստան կատարած այցի ընթացքում քննարկել էին նախարարների հանդիպման հարցը։

Անդրադառնալով երեկ երեկոյան ադրբեջանական լրատվամիջոցների տարածած տեղեկություններին, թե սահմանում լուրջ մարտեր են ընթանում եւ զոհեր կան, ԱԳՆ խոսնակն ասել է. «Այդ ամեն ինչը կեղծիք է»։

Նա հորդորել է հիմնվել միայն ՀՀ ՊՆ տրամադրած տեղեկատվության վրա։

Տիգրան Բալայանը տեղեկացրել է նաեւ, որ ՀՀ արտգործնախարար Զոհրաբ Մնացականյանը հունիսի 22-ին Մինսկում կմասնակցի Արեւելյան գործընկերության երկրների նախարարների ոչ պաշտոնական հանդիպմանը, իսկ հունիսի 28-29-ը Գերմանիայի արտգործնախարարի հրավերով կմեկնի Բեռլին։

Հունիսի 27-ին Երեւանում նախատեսված է Սեւծովյան տնտեսական համագործակցության կազմակերպության արտգործնախարարների խորհրդի նիստը, որին, Տիգրան Բալայանի խոսքով, կմասնակցեն կառույցի բոլոր անդամ երկրների պատվիրակությունները։